«Аспековдун жүрөгүнүн коронардык оорусу бар, аортокоранардык шунтирлөөдөн кийин ал дайыма дары ичип жашап жатат. Медиктердин корутундусуна ылайык, эгер жүрөгү ооруп баштаса, ага алты айдын ичинде стент жасоо керек болот. 7-майда жүрөгү ооруп, ТИЗОго тез жардам чакыртылган. Врачтар “туруксуз стенокардия (инфаркт алдындагы абал)” деген диагноз коюп, тез арада ооруканага жаткыруу керектигин айтышкан», — деп жазды ал.
Анын айтымында, ЖАК Аспековду ооруканага жаткыруудан баш тарткан, ал эми активист өзү үй-бүлөсүнө абалын айтпай койгон. Андан кийин 8-майда абалы кайра начарлап, аны ТИЗОго алып кетишкен, ал жерден изолятордун начальниги Аспековдун абалы канааттандырарлык экенин билдирген.
«Абалы кооптуу экенин адвокат кирип, аны текшерип чыккандан кийин билдим», — деп жазды Абдирасулова Юстиция министрлигин, акыйкатчы жана Кыйноолорго каршы улуттук борборду аны ооруканага жаткырууга көмөк көрсөтүүнү суранып.