V Дүйнөлүк көчмөндөр оюндарында Кыргызстандын курамасы көкпар оюну боюнча Казакстанга 4:5 эсебинде жеңилди.
Биринчи бөлүктө кыргыз улакчылары 3:2 эсебинде алдыга чыкса, экинчи бөлүктө 4:4 болуп эсеп теңелген. Кошумча 10 мүнөттө казактар биринчи болуп упай топтоп, жеңишке жетти.
Кыргызстан көкпардан буга чейин Монголияны 16:0, Түркияны 15:1 эсебинде уткан.
Эми 17:30да кыргыз улакчылары көкбөрү оюнунун финалында казак курамасы менен беттешет.
Дүйнөлүк көчмөндөр оюндарынын бешинчи күнү Кыргызстан командалык эсепте 38 медаль менен үчүнчү саптан орун алды. Биринчиде Казакстан, экинчиде Өзбекстан келе жатат.