Укук коргоочу Гүлшайыр Абдирасулова 23-декабрда Бишкектеги ТИЗО-1дин алдында «Азаттык» радиосунун эки журналистинин кармалышын айыптады.
Ал Октябрь райондук ички иштер башкармалыгынын журналисттердин кармалышын митингдерге тыюу салынганы менен түшүндүргөнү туура эмес экенин билдирди. Анын айтымында, соттун ал чечимин «эч ким көргөн эмес».
«Ал чечимдин ТИЗО-1ге жана камактагылардын жакындарына эч кандай тиешеси жок болушу керек. [Туугандары] жакындарына тынчсызданып, алар менен жолугуп, аман-эсен экенин көрүү үчүн келишкен. [...] Анда ооруканадагы бейтаптарды көргөнү баргандарды да митинг дегиле», — деп жазды ал.
Абдирасулова журналисттердин ишине тоскоолдук кылууга, ошондой эле аларды кармап, түшүнүк кат алууга эч кимдин укугу жок экенин белгиледи.
«Журналисттер акыр заман болсо да өз ишмердүүлүгүн жүргүзүүгө укуктуу. Ката кетиргенден кийин кайраттуу болуп, мыйзам бузулганын мойнуңарга алгыла», — деди укук коргоочу.
Күн мурун милиция «Азаттыктын» кызматкерлерин Бишкектеги №1 тергөө абагынын жанынан алып кетишкен. Ага чейин журналисттер нааразылык билдирип чыккан жарандардын биринен интервью алышкан. Укук коргоо кызматкерлери ЖМК өкүлдөрүнөн тартылган видеону берүүнү талап кылып, андан соң аларды милиция бөлүмүнө алып кеткен. Алар түшүнүк кат жазгандан кийин бошотулган.
Бул боюнча комментарий берген Бишкек шаардык ички иштер башкармалыгы соттун чечими менен Октябрь районунун аймагында митинг жана нааразылык акциясын өткөрүүгө тыюу салынганын билдирген. Милициянын маалыматына ылайык, буга карабастан 23-декабрда адамдар тобу ТИЗО-1дин алдында уруксатсыз акция уюштурган.
Мекемеден «акция» катышуучулары менен журналисттер түшүндүрүү иштерин жүргүзүү үчүн милиция бөлүмүнө жеткирилип, кийин бошотулганын кошумчалашкан.
Ага чейин ТИЗО-1де камакта отурган жарандар Чыңгыз Кожошевдин Жаза аткаруу кызматынын башчысы болуп дайындалышына каршы ачкачылык жарыялаганы белгилүү болгон.
