Кыргызстан менен Тажикстандын өкмөттүк делегациялары кыргыз-тажик чек арасын делимитациялоо жөнүндөгү акыркы протоколго кол коюшту. Бул тууралуу 21-февраль күнү кечинде «Ала-Арча» мамлекеттик резиденциясында делегациялардын башчылары Камчыбек Ташиев менен Саймумин Ятимов билдирди.
Ташиев бул «Кыргызстандын жана Тажикстандын эли үчүн өзгөчө тарыхый күн экенин» айтты.
«Биз тараптан жетекчилердин кол коюусу үчүн бир нече документ даярдалды: Кыргызстан менен Тажикстандын ортосундагы мамлекеттик чек ара тууралуу келишим, эки өлкөнүн өкмөттөрүнүн ортосундагы энергетикалык объектилер жана суу ресурстары боюнча макулдашуу, ошондой эле кайчылаш унаа жолдорун пайдалануу жана жаңы жолдорду куруу жөнүндө макулдашуу. Бүгүн биз [чек араны] макулдашууну биротоло аяктадык. Чек араны делимитациялоо жана демаркациялоо боюнча комиссияларыбыз “Кыргызстан менен Тажикстандын ортосундагы чек ара толук макулдашылды” деп расмий түрдө жарыялайт», — деди Ташиев.
Ятимов да кол коюлган документ «маанилүү тарыхый макулдашуу» экенин белгиледи. Анын айтымында, чек араны делимитациялоо жана демаркациялоо боюнча татаал жумуш аяктады.
«Макулдашуу ишке ашса, эки бир тууган республиканын ортосундагы 100 жылдык талаш-тартышка чекит коюлат», — деди Ятимов.
Ал бул документтер эки өлкөнүн элдеринин кызыкчылыгына кызмат кыларын кошумчалады.
Эми чек ара боюнча документтер эки өлкөнүн парламенттерине, андан соң кол коюу үчүн президенттерине жөнөтүлүшү керек.
Кыргыз-тажик чек арасынын жалпы узундугу 972 чакырымды түзөт. Бирок чек арадагы такталбаган аймактардан улам маал-маалы менен кагылышуулар болуп келген. Эң акыркы ири куралдуу жаңжал 2022-жылдын 14-17-сентябрында болгон. Анда эки тараптан тең жүздөн ашык киши өлгөн.
