Минкаб төрагасынын орун басары Эдил Байсалов БУУнун Адам укуктары боюнча кеңешинин 58-сессиясында сүйлөп, кыргыз-тажик чек арасы биротоло такталып бүткөнүн билдирди.
«Бул макулдашууга жетишүү үчүн кайраттуулук, чечкиндүүлүк жана тынчтыкка болгон бекем умтулуу талап кылынды. Бул келишим дипломатиянын жана аймактык кызматташтыктын күчүн далилдеп турат, биз бул жетишкендикти мындан ары да өркүндөтүүгө даярбыз», — деди ал.
Байсалов 31-мартта Хожент шаарында Кыргызстан, Тажикстан жана Өзбекстан президенттеринин үч тараптуу алгачкы саммити өтө турганын билдирди. Анын айтымында, бул «аймактык кызматташтыкты бекемдөөдөгү маанилүү кадам болот».
21-февралда Кыргызстан менен Тажикстандын өкмөттүк делегациялары кыргыз-тажик чек арасын делимитациялоо жөнүндөгү акыркы протоколго кол коюшкан. Анда кыргыз делегациясынын башчысы Камчыбек Ташиев бул «Кыргызстандын жана Тажикстандын эли үчүн өзгөчө тарыхый күн экенин» билдирген.
Анын айтымында, тараптар чек арага гана эмес, энергетикалык объектилерге, суу ресурстарына жана унаа жолдоруна байланыштуу да макулдашууларга кол коюшту.
Кыргыз-тажик чек арасынын жалпы узундугу 972 чакырымды түзөт. Бирок чек арадагы такталбаган аймактардан улам маал-маалы менен кагылышуулар болуп келген. Эң акыркы ири куралдуу жаңжал 2022-жылдын 14-17-сентябрында болгон. Анда эки тараптан тең жүздөн ашык киши өлгөн.
