Бул тууралуу Транспорт каражаттарын жана айдоочулук курамды каттоо агенттигинин башчысынын орун басары Бакытбек Шералиев «Биринчи радионун» эфиринде билдирди.
Анын айтымында, оң рулдуу жана чет өлкөлүк номурлуу унааларды легалдаштыруунун баасы бардыгы үчүн бирдей болот. Ошол эле маалда бул сумма 102 миң сомго чейин өсүшү мүмкүн, анткени унаа ээлери мамлекеттик номур жана каттоо тууралуу күбөлүк үчүн кошумча акча төлөшү керек болот.
Шералиев өлкөгө 2024-жылдын 31-декабрына чейин кирген автоунаалар гана легалдаштырыла турганын белгиледи.
«Азыр токтом долбоору президенттик администрацияда. Марттын башында Минкабдын токтомуна кол коюлары менен кайсы күндөн тарта кайсы бөлүмдөргө кайрылуу керектигин кабарлайбыз», — деди ал.
Шералиев автоунааларды легалдаштырууну Транспорт каражаттарын жана айдоочулук курамды каттоо агенттиги жүргүзө турганын кошумчалады.
Январда президент Садыр Жапаров оң рулдуу жана чет өлкөлүк номурлуу унааларды легалдаштырууга уруксат берген жарлыкка кол койгон. Ага ылайык, автоунааларды легалдаштыруу үч баскычта жүрөт. Алгач документтери бар унаалар, андан соң документсиз унаалар мыйзамдаштырылып, акырында документтери жок, бирок өлкөдөн чыгарып кетүүгө же тетиктерге бөлүп сатууга уруксат бериле турган унаалар легалдаштырылат.
2024-жылы октябрда ички иштер министринин орун басары Эркебек Аширхожаев унааларды Кыргызстанга тетик катары алып келип, кийин кураштырган учурлар көбөйгөнүн билдирген.
Декабрдын башында УКМКнын башчысы Камчыбек Ташиев атайын кызмат өлкөгө армян жана абхаз номурлуу унааларды ташып келүүгө байланышкан ири коррупциялык схема боюнча тергөө жүрүп жатканын айткан.
УКМКнын маалыматына ылайык, Кыргызстанда Армениядан жана Абхазиядан алып келинген жалпысынан 15 миңге жакын унаа болсо, алардын 90% оң рулдуу.
Декабрь айында аймактардагы айдоочулар чет өлкөлүк номурлуу унаалар жапырт текшерилип, айып жайына киргизилип жатканын билдиришкен. Алар насыялары бар экенин, унаасыз үй-бүлөлөрүн бага албай калышарына даттанышкан.
