Ноокатта жана Караколдо эки өспүрүм асынган абалда табылды. Бул тууралуу облустук ички иштер башкармалыгы билдирди.
Маалыматка караганда, 21-февралда Караколдо 16 жаштагы өспүрүм ээн калган имаратта асынган абалда табылган. Маркум 19-февралдан бери апасынын арызынын негизинде издөөдө жүргөн. Ага тиешелүү экспертизалар дайындалган.
Ал эми, 22-февралда Ноокат районуна караштуу Бел айылында 12 жаштагы өспүрүм өз үйүнүн короосунда асынган абалда табылган. Маркумдун жакындары соттук медициналык экспертизадан баш тартып, денесине сырттан кароо жүргүзүлгөн. Сөөк туугандарына өткөрүлүп берилген.
Учурда бул иштер боюнча тергөөгө чейинки текшерүү иштери жүрүп жатат.
Акыркы айда өспүрүмдөрдүн бир катар өлүмү катталды. 5-февралда Ысык-Көлдө 18 жаштагы кыз жипке асынып, ооруканада көз жумган. 12-февралда Кара-Сууда 9-класстын окуучусу сабалгандан кийин каза тапкан. Ал эми 16-февралда Токмокто 16 жаштагы өспүрүмдүн өлүмү тууралуу кабарланган.