1-апрелде Бишкектеги Горький атындагы гүлбакта Жер кодексинин жаңы редакциясына каршы акция өттү.
50гө жакын жаран — «Киргизия-1», «Киргизия-2» конуштарынын жана Чоң-Арык айылынын тургундары — президенттин атына жолдонгон кайрылууга кол топтоо үчүн чогулушту.
Алар жаңы Жер кодексин кабыл албоону өтүнүп, алардын мүлкүн «тартып алууну» токтотууну талап кылууда.
Жарандар президентке жолдонгон кайрылууда Жер кодексинин көпчүлүк жеринде мыйзам бузуу процедуралары байкалганын белгилешти.
«Конституциянын нормаларына каршы келген Жер кодексине вето коюп, четке кагууну өнүнөбүз. Ошону менен бирге өздөрүнүн орунсуз “ишмердүүлүгү” менен коомдо негативдүү жагдай жараткан айрым аткаминерлерди ээлеген кызматтарынан бошотуп, дисциплинардык чара көрүүнү талап кылабыз», — деп жазылган кайрылууда.
Жарандар ошондой эле УКМКнын башчысы Камчыбек Ташиевге кайрылып, укук коргоо кызматкерлери активисттер менен иштешкен учурда мыйзамдарды так сакташын жана акыйкаттуулукту камсыздап иш алып баруусун тыкыр көзөмөл кылууга чакырышты.
Жарандар алгач Жогорку Кеңештин алдына чогулууну пландаган. Кийинчерээк акцияга бара турганы жөнүндө Facebook баракчасына жазган жаран атайын кызматка маектешүүгө чакырылган. Анын эртеси бийлик Бишкектин борбордук бөлүгүндө митинг өткөрүүгө салынган тыюунун мөөнөтүн июнь айына чейин узарткан.
Мурдараак милиция пенсионер Ольга Иващиненкого «жапырт башаламандыктар» боюнча кылмыш ишин козгоп, үйүн тинтүүгө алган. Ага чейин ал багбанчылардын атынан жаңы Жер кодексине каршы чыккан.
13-февралда Жогорку Кеңештин депутаттары Жер кодексинин Минкаб демилгелеген жаңы редакциясын кабыл алган. Документке ылайык, бийлик эми «мамлекеттик маанидеги инвестициялык долбоорлор» үчүн тургундардын жерин сатып ала алат — бирок кандай баада экени белгисиз.
Президент Садыр Жапаров жеке менчик кол тийбес экенин белгилеп, жер тилкелерин тартып алууга каршы экенин билдирген. Ошол эле маалда ал жаңы Жер кодексинде жерлерди тартып алуу жөнүндө сөз жок деген божомолун айткан.
