Бүгүн, 2-апрелде, парламентте депутат Надира Нарматова Ноокат районунда окуучуну мугалими зордуктаганын айтып, ИИМди бул ишти көзөмөлгө алууга чакырды.
«Ноокат районунда бир окуучу мугалим тарабынан зордукталып, бүгүнкү күндө бала ооруканада, тиги кишини камап коюшкан. Бул өтө жаман нерсе. Сиз ошону аныктаңыз дагы, мыйзам ченемдүү көзөмөлгө алыңыз»,— деди Нарматова.
Бул боюнча Ош ОИИБи «Клоопко» ырастап, факт каттоого алынганын билдирди.
Кылмышка шектүү катары Ноокат районунун 1982-жылы туулган тургуну кармалып, 24-мартта райондук соттун чечими менен камакка алынган. Ага «Сексуалдык мүнөздөгү зомбулук аракеттер» беренеси боюнча кылмыш иши козголгон. Учурда тергөө уланууда.