Кыргызстанда оюн учурунда каза болгон улакчы Мирлан Сраждиновдун өлүмүн шылтоолоп, көк бөрүнү жок кылууну каалаган «күчтөр бар». Бул тууралуу парламенттин жыйынында депутат Балбак Түлөбаев билдирди.
«Көк бөрү — кыргыздын улуттук оюндарынын бири. Бул [көк бөрү] аксакалдар соту, калпак, камчы дегендей эле биздин сыймыгыбыз», — деди ал.
Түлөбаев спорттун ар бир түрүндө кырсык болуп, адам өлүшү мүмкүн экенин белгиледи. Анын пикиринде, болгону эрежелерди өзгөртүп, оюнду уланта берүү керек.
«Өткөндө көк бөрүдө кырсык болуп, бир жараныбыз өтүп кетти. Ошонун айынан калысты жана ат менен келип сүзгөн оюнчуну да камап коюшуптур. Бул эми кырсык да. Ушунун айынан көк бөрү оюнун жок кылганга аракет кылган күчтөр да бар. Буга жол бербешибиз керек», — деди депутат.
Аны айрым кесиптештери колдоду. Депутат Илимбек Кубанычбеков оюнчулар жаракат алып, «майып болуп калып жатканын» айтып, оюндун эрежелерине бир катар өзгөртүүлөрдү киргизүү керектигин билдирди.
Депутат Аккулу Бердиев көк бөрүдөн тай казанды алып салуу керек деп эсептейт.
«Көптөгөн балдардын бели үзүлүп кетти, аттары жаракат алып жатат. Кыргызда убал деген сөз бар. Тай казанды жоготуш керек. Мына, казактарда көкпар деп ордого окшоп чийип туруп эле [улакты] ошого таштап жатат. Биз деле жаш кезибизде улак чапканбыз. Аламан улак деп эле чапчу эле, ал жерде адамга да, аттарга да зыяны жок. Ата-бабаларыбыздан бери ошондой чабылып келген. Тай казан деген кечээ жакында эле пайда болду. [...] Ал балдарга, аттарга зыян болуп жатат», — деди Бердиев.
12-мартта Бишкектеги көк бөрү мелдешинде «Бөрүлү» командасынын капитаны Мирлан Сраждинов каза болгон.
Анда милиция оюн учурунда Сраждиновду ат менен келип сүзгөн улакчыны жана беттештин калысын кармаган. Соттун чечими менен оюнчу эки айга камалып, калыс үй камагына чыгарылган. Алар «Адам өлүмүнө алып келген саламаттыкка оор зыян келтирүү» беренеси боюнча айыпталууда.
