Бишкектеги №1 тергөө абагында камакта жаткан журналист Канышай Мамыркулова коомчулукка кайрылуу кат жазды. Аны жарандык активист Аманбол Бабакулов Facebook баракчасына жарыялады.
Катта Мамыркулова кылмыш кылбаганын белгилеп, өзүнүн коомдук, саясий жана социалдык маселелерди чагылдырганы үчүн ага карата иш козголгонун билдирди.
«Мен адам өлтүргөнүм, мамлекетти тоногонум, пара алганым жок. Коомчулуктун укуктук, саясий, экономикалык, социалдык, маселелерин эле пост кылып чагылдырып келдим. Ал эми мага козголгон кылмыш иши боюнча айтсам, КЖКнын 278 беренесинин 3-бөлүмү жана 330 беренесинин 1- бөлүгүнө жаткан кылмышты эч качан жасаган эмесмин жана жасабайм. Муну тараптардын бардыгы жакшы билишет. Коомчулуктун каалаганын каалагандай формада жазып, көкөйлөрүнө тийген үчүн асмандан-жерден алып, кылмыш иш “токулду”. Муну өздөрү дагы, юристтер, адвокаттар дагы, укук коргоо тармагы менен тыгыз иштешкен адам катары өзүм дагы жакшы билем»,
— деп жазган Мамыркулова.
Журналист кайрылуусунда бийликти жана коомчулукту чындыкты кабыл алууга чакырды. Ал жашоо кыска экенин эске салып, «акыбызды жешпейли» деген оюн билдирди.
«Бийлик үчүн мен кылмыш кылганым жок. ООНго чейин арызданып, Атай Бейшенбек баш болуп, фейсбук колдонуучулар төш болуп, “Агрессор” деп үч жыл мурун кыйкырганда кылмыш болбойт. Ошону эстетип койгон мага кылмыш иши илинип калабы? Акты ак, көктү көк дейли. Бул өмүр кыска, ширеңкедей эле, акыбызды жешпейли. Кыргыз бийлиги жана ага кызмат кылгандар каалаганына жетти. Буга деле таарыныч, азырынча жок, анткени менин ишим шаардык сотто каралат»,
— деп жазылган катта.
Журналист өзүн колдогондорго ыраазычылык билдирип, коомчулукту, кесиптештерин жана санаалаштарын Бишкек шаардык сотунда өтө турган ишинде аны колдоого чакырды.
«Ток этээри, “эже сизди, сиздин принциптерди сыйлайбыз” деп кулагыма айткан, фб га жазган санаалаштардын бардыгын, коомчулукту, Бишкек шаардык сотунда карала турган ишке байланыштуу келип, колдоп берүүңуздөрдү өтүнөм. Сөз иш менен бекемделгени жакшы. Өзүм дагы өпкөлөбөй чын эле чындык сүйүүчүлөр канча адам экенин көрөйүн. Бийлик дагы ошого жараша чечим чыгарсын»,
— деген Мамыркулова.
Канышай Мамыркулованы милиция 20-мартта үйүнөн кармап кеткен. Милиция журналист Facebook баракчасы аркылуу «кыргыз-тажик чек арасы боюнча бурмаланган маалыматтарды» таркатканын билдирген. Ага «Жапырт башаламандыктарга чакыруу» жана «Раса, улут, дин жана аймак аралык кастыкты козутуу» беренелери боюнча айып тагылган.
22-мартта Бишкектин Свердлов райондук соту аны 19-майга чейин ТИЗОго камакка алган.