24-декабрда Бишкектин Биринчи май райондук сотунун судьясы Чыңгызбек Бердимуратов KG Group курулуш компаниясынын ээси Имамидин Ташовдун иши боюнча сот отурумун 14-январга жылдырды. Буга чейин мындай өтүнүч менен сотко ишкердин адвокаттары кайрылган.
Отурумдун жүрүшүндө адвокат Нурсултан Жаныбеков прокурорго ишенбөөчүлүк көрсөттү. Анын пикиринде, мамлекеттик айыптоочунун бул иште жеке кызыкчылыгы бар.
Өз кезегинде прокурор адвокаттын өтүнүчү негизсиз экенин жана ал эч кандай далил келтирбегенин билдирди. Жыйынтыгында сот өтүнүчтү канааттандыруудан баш тартты.
Отурум аяктап, судья залдан чыгып кеткенден кийин Ташов журналисттердин суроолоруна жооп бере баштаган. Бирок күзөт кызматкерлери ЖМК өкүлдөрүнө видеого тартууга тоскоолдук кылышты.
Кийинки сот отуруму 14-январга белгиленди.
