1980-жылдары «Нарын» рестораны Бишкектеги эң көп киши кирген жайлардын бири болчу. Ал шаардын борборунда, Жеңиш аянтынын маңдайында жайгашкан. Акыркы 10 жылдан бери имарат кароосуз, ээн калган.
Ресторандын ыңгайлуу жайгашкан орду, мыкты ашканасы, ылайыктуу баалары, көркөмдүгү жана шаңдуулугу шаар тургундары менен конокторун өзүнө тартып турган. Анда туулган күндөрдү белгилеп, үйлөнүү той жана башка иш-чаралар өтүп турган.
Бирок бул алыскы 80-жылдары болгон.
2005-жылдагы бийлик алмашуудан кийин имарат бир колдон экинчи колго өтүп, ээлери тез-тез алмашып баштаган. Сыртындагы жазуулардан анын казино жана түнкү клуб катары пайдалангандыгы көрүнүп турат.
Учурда «Нарын» рестораны адам ыйларлык абалда. Мурунку көркөмдүгүнөн болгону бош дубалдары, төшөлмөлөрү жана таштандылар гана калган.
Имараттан каңырсыган жыт уруп турат.
Ресторан үй-жайсыз адамдардын баш калка жайы болуп калган, алар имаратка жакын келгендерди кубалашат.
Алыстан түрдүү сөлөкөттөрдүн формасында талкаланган терезе айнектери көрүнүп турат.
Дубалдары ар түрдүү жазуулар менен «кооздолгон», арасында адепсиз сөздөр дагы бар.
Азыр имраттын кимге таандык экендиги жана аны алдыда эмнелер күтүп тургандыгы так белгисиз.
Сүрөт: Роза Ланахунова, Элдор Далиев жана Бану Багери