Мурунку президент Курманбек Бакиевдин иниси Ахмат Бакиев медициналык борборлордун биринде дарыланып жатып "качып кеткендигин" жаза аткаруу кызматы кабарлады. Эскерте кетсек, Бакиевдин иниси 2014-жылга чейин эркинен ажыратылган эле.
Жаза аткаруу мамлекеттик кызматынын басма сөз катчысы Александр Никсдорф, Ахматбек Бакиевдин №35 колония поселениеден качып кеткендиги жөнүндөгү маалыматты тастыктады.
Анын айтымында, президенттин иниси Бишкек шаарындагы медициналык борборлордун биринде стационардык дарыланууда жаткан.
«№35 колониянын кызматкерлери күндө ооруканага келип, ордундабы жокпу текшерип кетишчү. Бирок 3-мартта түштөн кийин текшерүү келип Бакиевди таба алган эмес», — дейт Никсдорф.
Никсдорф менен болгон интервьюну жүктөп алуу
Басма сөз катчынын айтымында, азыркы учурда бардык күч структуралары Бакиевдин инисин издеп жатышат. Колония-поселениедегилер сакчы-конвоирсиз жүрүшөт, алардын "эркиндигин эч ким чектебейт", деп Никсдорф белгилеп өттү.
«Бакиев ооруканада сакчыларсыз болчу. Кайтып келет деп үмттөнөнбүз», — дейт басма сөз катчы.
Президенттин инисинин жоголгондугу жөнүндөгү маалымат 5-мартта түшкөн. Ахмат Бакиевдин кайда экени азыр белгисиз. Изделип жатат.
Ошого карабастан, колония-поселениедегилер ар бир ишемби күнү катталып туруш керек, дейт Никсдорф. Ахмат Бакиев ишемби эртең менен ооруканада болчу.
«Апта бою аларды [соттолгондорду] эч ким тескебейт. Бирок ар бир ишемби келип катталып кетиш керек. Кийинки ишембиге чейин эркиндигин эч ким чектебейт», — дейт Никсдорф.
Мурунку президент Курманбек Бакиевдин иниси Ахмат Бакиев 2010-жылдын июль айында Жалал-Абад облусунда кармалган.
Бейбаштык, мыйзамсыз түрдө курал-жарак сактоо жана алдамчылык боюнча күнөөлүү деп табылган.
Жети жыл эркинен ажыратылып, жазасын колония-поселениеде өтөмөк. Бирок амнистиядан кийин бул мөөнөт 2014-жылдын сентябрь айына чейин кыскарган.
ЖАМКтын маалыматы боюнча, 2012-жылдын 24-январында Ахматбек Бакиевдин ден-соолугу бузулуп, Бишкектеги ооруканалардын бирине жеткирилген.
Авторлор: Эльдияр Арыкбаев жана Раим Досункулов
Которгон: Бермет Абдыкадырова
Сүрөт «Азаттык» радиосунан алынды