Биринчи май райондук соту Ахмат Бакиевди камакка алуу керектиги жөнүндөгү өкүм чыгарды. Ооруканадан качып кеткенден бери Курманбек Бакиевдин иниси изделип жатат.
Биринчи май сотунун судьясы Адылбек Субанкулов, 3-мартта ооруканадан качып кеткен Ахмат Бакиевдин жазасын күчөттү.
Колония-поселениеде жаза өтүү өкүмү УККнын тергөө абагында камалуу менен алмаштырылды.
«Муну менен бирге Ахмат Бакиев кылмыш жаза кодексинин «Түзөтүүчү мекемелерден жана камактан качып кетүү» 336-беренесинин 1-бөлүмү боюнча да мыйзам бузду», — делет Жогорку Соттун пресс-релизинде.
Жаза аткаруу мамлекеттик кызматынын (ЖАМК) басма сөз катчысы Александр Никсдорф, Ахмат Бакиевдин качып кеткендиги боюнча 6-мартта кылмыш иши козголгондугун маалымдады.
"Азыркы күндө ички иштер министрлигинде иликтөө иши жүрүп жатат. Мындан сырткары ЖАМКтын үч кызматкери кирген атайын иликтөө комиссиясы түзүлүүдө», — дейт ЖАМКтын өкүлү.
Ахмат Бакиевдин жоголуп кетүүсү.
Ахмат Бакиев жоголуп кетүүдөн мурун «КафМедЦентрПлюс» жеке клиникасында стационардык даарылануу өтүп жаткан.
«№35 колониянын кызматкерлери күндө ооруканага келип, ордундабы жокпу текшерип кетишчү. Бирок 3-мартта түштөн кийин текшерүү келип Бакиевди таба алган эмес», — дейт Никсдорф.
«Колония-поселениедегилер сакчы-конвоирсиз жүрүшөт, алардын «эркиндигин эч ким чектебейт. Алар ар бир ишемби келип катталып кетиши керек», — деп Никсдорф белгилеп өттү.
«Апта бою аларды [соттолгондорду] эч ким тескебейт. Бирок ар бир ишемби келип катталып кетиш керек. Кийинки ишембиге чейин эркиндигин эч ким чектебейт», — дейт ЖАМКтын басма сөз катчысы.
Ахматбек Бакиев 2010-жылдын июль айында камакка алынган. Бейбаштык, мыйзамсыз түрдө курал-жарак сактоо жана алдамчылык боюнча күнөөлүү деп табылган.
Жети жыл эркинен ажыратылып, жазасын колония-поселениеде өтөмөк. Бирок амнистиядан кийин бул мөөнөт 2014-жылдын сентябрь айына чейин кыскарган.
ЖАМКтын маалыматы боюнча, 2012-жылдын 24-январында Ахматбек Бакиевдин ден-соолугу бузулуп, Бишкектеги ооруканалардын бирине жеткирилген.
Автор: Эльдияр Арыкбаев