Милиция 2010-жылдагы апрель революциясы маалындагы талап-тоноочулукка шектелип жаткан «Ата-Мекен» фракциясынын депутаты Райкан Төлөгөновдун жардамчысын кармады. Төлөгөнов комментарий берүүгө жеткиликсиз болуп жатат.
Ички иштер министрлигинин Уюшкан кылмыштуу топко каршы күрөшүү башкармалыгынын кызматкерлери депутат Төлөгөновдун жардамчысы Нурлан Асановду кармады — Асанов «алдамчылыкка» жана «ишенип тапшырылган мүлктү менчиктештирип алууга» шектелип жатат.
ИИМдин басма сөз катчысынын маалыматы боюнча, Асанов качып кеткен президент Курманбек Бакиевдин үй-бүлөсүнүн колдоосу алдында 2007-2008-жылдардын аралыгында бизнестерди рейдерлик жол менен тартып алып турган.
Ошондой эле Асанов 2002-жылы 20 жарандан 100 миң сом алып, качып кеткен деп шектелүүдө.
Асановдун телефону өчүк болуп атат.
Kloop.kg депутат Төлөгөнов менен байланыша алган жок.
«Мародер-депутаттар»
«Атамекенчилер» «Республиканын» лидери, мурунку премьер-министр Өмүрбек Бабановду «коррупцияга» күнөөлөгөндөн кийин августтун ортосунда «Республика» партиясы камакта жаткан Абдулла Юсуповдун көрсөтмөсүн жарыялаган.
Юсупов ал видоедо «Ата-Мекен» фракциясынын депутаттары Өмүрбек Текебаев, Болот Шер, Туратбек Мадылбеков жана Райкан Төлөгөновдордун 2010-жылдагы апрель революциясындагы талап-тоноочулукка тиешеси бардыгын айткан.
Депутаттар болсо күнөөлүү эмес экендиктерин айтып жатышат.
Автор: Шахида Дүйшеева
Редактор: Зарема Султанбекова
Сүрөт ktrk.kg сайтынан алынды