Ош облусунун Кара-Суу районундагы Кызыл-Кыштак айыл округунда чакан бут кийим тигүүчү цехтин ачылганына 1 жылдай болду. Абдылда Мадрахимов ажы цехти ачкандан бери 15ке жакын адамды жумуш орду менен камсыз кылды. Арасында ата-энеси жок жетим балдар да бар. Эң кызыгы ал иттин терисинен да укмуштай бут кийимдерди тигет.
Абдылда Мадрахимовдун атасы чоң уста болгон. 6 жашынан баштап атасына каралашып, жардам берип жүрүп бут кийим тигүүнү үйрөнгөн. Бала кезинен эле абдан жөндөмдүү, чыйраак болгондуктан ата өнөрүн улап кетти.
“Жаштайымдан эле өзүмдүн бизнесим болсо эч кимден акча сурабасам деп тиленчү элем. Анан атамдын ишин улантып, мынтип өз алдымча цех ачканга да жетиштим”,-деп кудуңдайт Мадрахимов.
Абдылда ажыга барып келип, шариятты катуу кармагандыктан, ишканасында аялдар бөлөк, эркектер бөлөк иштешет. Ал эмес ажааткана, дааратканасы да эки башка.
“Мен ажыга барып келгенден кийин адамдарга болгон көз карашым өзгөрдү. Көрсө, мусурманчылыкта сенин курсагың ток кийимиң бүтүн болсо, эгерде кошунаң ачка, наны жок олтурса, кудайдын алдында жооп бересиң. Мен кудайдан коркомун жана парздарды аткарганга аракет кыламын. Азыр көчөнү карасаң кээ бир жаштар жөн эле бекер жүрөт. Алар бир күн эмес бир кун, уурулук кылат, адамдарды тонойт ж.б. жаман жолдорго түшүп кетиши мүмкүн. Ошолорго мен бир чоң бут кийим тиге турган цех ачсам деген ойдомун. Көптөгөн адамдар жумуш орун менен камсыз болмок. Эгерде демөөрчү болуп бизге жер тилке жана имарат менен жардам берсе жакшы болот эле”,-дейт уста киши Абдылдажан.
Ал өзү ишинде кайрымдуулук кылып көбүнө жардам берет. Кол алдында иштеген Шамурод Кочкоров ата-энесиз бала болгондугуна байланыштуу Абдылда ажы анын үйлөнүү тоюна кеткен каражаттын баарын өз мойнуна алган.
“Отанинг ҳунари, боланинг унари”,-деген макал өзбек элинде жакшы таркаган. Же кыргызча айтканда, “Атанын өнөрү, баланын ырыскысы”. Балдары 5 жыл жогорку окуу жайда окуп, анан жумушсуз жүргөнгө караганда бир өнөр үйрөнүп алса жана ошондон акча тапса, үй-бүлөсүн бакса жакшы деп балдарын да өз өнөрүнө үйрөткөн.
Кочкоров Шамурод ата-энесиз бала болгондугуна байланышту Абдылда ажы Шамуроддун үйлөнүү тоюна кеткен каражаттын баарын өз мойнуна алган.
МАИнин кызматкери Мухаммед Арзыбаев: “Мен иттин терисинен жасалган өтүк сатып алгам, дарылык касиети бар, жылуу, ыңгайлуу. Биз кышында көчөдө иштегенге байланыштуу бутубузду жылуу кармашыбыз керек. Абдылажан аке кышкы, жайкы, жазгы бут кийимдерди тигет. Оштон гана эмес Бишкектен жана башка өлкөдөн буюртма беришет. Сапаты эң мыкты”.
Абдылда ажы Ош боюнча эң мыкты уста. Дипломдору жана сертификаттары бар. Өзбекстанда болуп өткөн конкурста алдыңкы орунду алган.
Мадрахимов бул ийгиликтер менен эле токтоп калбай, бизнесин мындан ары да өнүктүргөнү турат.
“Жакында Италиялык «Kenzo» сапатындагы бут кийимден кем калбаган бут кийимдерди чыгарамын. Заводду Ошко курганы жатам. Мен Түркияга барып бут кийим заводун көрүп келдим. Ал жакта италиялык аппараттар менен эң мыкты бут кийимдер чыгарышат экен”,-дейт ал.
“Балам барып алардын ыкмаларын үйрөнүп келет. Туркиядан адис чакырсак анын айлык акысы жогору болот. Биз жаңы ачылганга байланыштуу бизге пайдасыз. А өзүбүз билсек бул биз үчүн өтө пайдалуу болот. Кудай буйруса Кыргызстанда да Түркия бут кийиминен кем эмес бут кийимдерди чыгарабыз”,-дейт Мадрахимов.
Автор: Элиза Таштанова, сүрөттөр автордуку.
Редактор: Эрнист Нурматов.