Дүйнөлүк көчмөндөр оюндарында Кыргызстандын көк бөрү боюнча курамасы финалда казактардын командасын 15:3 эсебинде утуп алып, алтын медалга ээ болду.
Көк бөрү боюнча финалдык таймаш Дүйнөлүк көчмөндөр оюндарынын жабыла турган күнү 8-сентябрда Чолпон-Ата шаарындагы ат майданда болуп өттү. Кыргыздардын курама командасы бул майданда Казакстан курама командасы менен беттешти.
Оюндун биринчи бөлүгундө кыргыздар оюндун эсебин ачып, каршылаштарына карай чабуулга өтө башташты. Биринчи бөлүктүн жыйынтыгы 7:1 эсебинде кыргыз командасынын жеңиши менен аяктады.
Экинчи бөлүктө кыргыздар 3 упай топтошсо, казактар 2 упайга ээ болушту.
Ал эми үчүнчү бөлүктө кыргыздар казактарга бир дагы упай алууга жол бербей, тескерисинче алардын тайказанына 5 ирет улак ташташты.
Оюндун жыйынтыгында кыргыз спортчулары 15:3 эсебиндеги жеңишке жетишип, Кыргызстандын курама командасын алтын медалга жана 3,5 миллион сомго ээ болду.
Экинчи орунга Казакстан, үчүнчү орунга Кытай ээ болду.
Көк-бөрү — бул кыргыздардын жана Борбордук Азия өлкөлөрүнүн салттык жана улуттук оюну.
Оюнга 12 атчан адамдардан турган эки команда катышат. Бирок талаага ар бир командадан төрттөн адам чыгат. Аларды жана аттарын дагы алмаштырып турууга болот.
Оюн жыйырма мүнөттүк үч бөлүктөн турат. Оюндун максаты — улакка (33 килограммга чейинки чыныгы, же муляж болушу мүмкүн) ээ болуу жана аны каршылаштарынын 3,6 метр диаметрдеги тайказанына ыргытуу. Улакты өнөктөштөрүнө улам өткөруп берип жардамдашып тайказанга жеткирсе да болот.
Каршылаштарына карата жана анын атына күч көрсөтүүгө тыюу салынат. Эреже бузган оюнчуну «кара мамы» деген атайын талаага эки мүнөткө оюндан четтетет же такыр эле талаадан чыгарып жиберет.
Сүрөт: Светлана Зеленская