Депутаттар Маданият министрлигинин башчылык кызматына КТРКнын мурдагы башчысы Сутан Жумагуловду көрсөтүштү. Профилдик комитет Жумагуловдун талапкерлигин бул кызматка колдоду.
Парламенттин социалдык маселелер, билим берүү, илим жана маданият боюнча комитети Жумагуловдун талапкерлигин Маданият министрлигинин башчылыгына колдоду.
24.kg басылмасы билдиргендей, ошондой эле, бул кызматка драматург Сутан Раев менен мурдагы билим берүү министри Элвира Сариева талапкер болууда. Ал эми Сариева өзү ага бул кызматты сунуш кылышканы боюнча маалыматты четке какты.
Маданият министрлигинин мурдагы башчысы Түгөлбай Казаков 28-октябрда экспонаттардын жоголушу менен бир жарым миң жылдык мумиянын жерге берилиши боюнча чыккан чатактын шартында кызматтан кеткен.
Коопсуздук кеңешинин катчылыгы Бишкектин Фрунзе атындагы жана Тарых музейиндеги экспонаттардын жоголгонун билдирген. Коопсуздук кеңешинин маалыматына ылайык, Маданият министрлиги экспонаттардын жоголушу боюнча маалымдаган эмес.
Ошондон кийин өкмөткө Маданият министрлигин ишмердигин текшерүүнү сунушташкан.
Мумиянын жерге берилиши
Мындан тышкары, 12-октябрда Маданият министрлиги Тарых музейинен аялдын мумиясын алып, аны Баткен облусуна жерге берүүнү чечкен.
Казаков ошондо мумиянын жерге берилиши боюнча маселе «аны эч ким карабай» жана аны иликтегенге «атайын жабдыктардын жоктугуна» байланыштуу болгонун айткан.
«Мумия сакталып жана күлгө айланып кетпеши үчүн атайын бальзамдоо процедураларын жүргүзүү талап кылынат, ал ошол эле каражаттын жана атайын адистердин жоктугу себептеринен улам жасалган эмес», — деген Казаков.
Тарыхчылар менен археологдор аталган мекеменин аракетине наарызы болушкан. Алар Маданият министрлигинин чечимин «вандализм актысы» деп аташып, ал эми Казаковдун өзүн кызматтан четтетүүнү талап кылышкан.
Илимдер академиясынын окумуштууларынын бири Кадича Ташбаеванын айтымында, мурдагы министр диний ишмерлердин таасиринин алдында мумияны жерге берүүнү чечкен, алар шарият боюнча адамдын мумиясын жерге берүү керек деп эсептешкен.
«Биз 20 жылдан бери бул асылуулардан коргонуп келгенбиз. Ал эми учурдагы министр дагы динчил адам болуп, биз мусулманбыз, бизде мындай болбошу керек деп айтты», — деп билдирген Ташбаева.
Бул темага арналган маалымат жыйындарынын биринде, Казаков мумиянын айланасындагы чатакты «атайын чыгарышканын» билдирип, ал эми тарыхчылар анын кызматтан кетүүсүн каалап жатышканын айткан.
«Силерге сыр ачыйын: көптөн бери министрдин кызматтан кетүүсүн каалап жатышат. Бул байкуш мумиянын 60 жылдан бери эч кимге кереги жок болчу. Ал жөн гана экспонат катары турган», — деп билдирген ал.
Министр музейде мумиянын кичинекей бир териси менен чачы калтырылганын айтты. Анын айтымында, бул изилдөө жүргүзүүгө жетиштүү.
«Эгерде бүгүн мени кызматтан алышса, маселе чечилет. Мага демектен мени атып салышсын, бирок өлгөндөрдү шылдыңдабаш керек», — деп билдирген Казаков.