Кылмыш иши 2012-жылы «ТНК Дастан» ишканасына буюмдарды жеткизүү боюнча келишимдин айынан козголду — компания 553 миң долларга келишим түзгөн, бирок факт жүзүндөгү баасы 63 миң долларды түзгөн. Улуттук коопсуздук боюнча мамлекеттик комитет (УКМК) мындан 470 миң доллар коротулганын көрүүдө. Ал кезде «ТНК Дастан» ишканасын Бишкектин учурдагы мэри Албек Ибраимов жетектеген.
Маалымат саат 15:40да жаңыртылды.
553 миң долларга келишим «ТНК Дастан» ишканасы 2012-жылы акциялардын 30 пайызына ээлик кылган «Дастан инжиниринг» компаниясы менен түзүлгөн. «Дастан инжиниринг» өз кезегинде ошол эле товарды жеткизүү боюнча Украинанын мамлекеттик компаниясы менен макулдашып, бирок жеткирүүнү кошуп 63 миң долларга келишим түзүлгөн.
Натыйжада ортодогу айырма 470 миң долларды түзгөн — УКМК Кылмыш-Жаза кодексинин «Өзгөчө ири өлчөмдө ишенип берилген мүлктү кызмат абалынан кыянат пайдалануу менен ыйгарып алуу же коротуу» 171-беренесинде каралган кылмыш белгилери боюнча кылмыш ишин козгоду.
«ТНК Дастан» ишканасын ошол кезде экс-президент Алмазбек Атамбаевдин жакын үзөңгүлөшү жана Бишкектин учурдагы мэри Албек Ибраимов жетектеп турган.
УКМК тергөөгө таянып, Ибраимов бул иш боюнча ким катары өтүп жатканын ачыктаган жок. «ТНК Дастан» кандай буюмдарды сатып алганы да белгисиз.
Ибраимов журналисттерге ал «эч нерсе билбесин» айтты. Андан сырткары, ал кылмыш ишин козгоо саясатка байланыштуубу же жокпу деген суроого комментарий берүүдөн да баш тартты.
«Комментарий берүү үчүн эс тутумду калыбына келтирүү керек, маалымат көп, 2011-жылдан баштап эстеш керек, андан бери 8 жыл өттү», — деп келтирди «Тазабек» басылмасы анын айткандарын.
«ТНК Дастан» мекемесине буюмдарды жеткизүү боюнча иш козгоо жаңы президент Сооронбай Жээнбековдун жана мурдагы президент Алмазбек Атамбаевдин командаларынын ортосундагы көмүскө тирештин шартында болуп жатат.
Акыркы үч айдын ичинде Атамбаевге жакын аткаминерлер мамлекеттик органдардагы өз кызматтарынан кетип, же болбосо кылмыш иштеринин фигуранттары болуп калышкан.
«ТНК Дастан» боюнча иш козголгонго чейин бир күн мурда УКМК Атамбаевге таянып, бир нече жыл анын администрациясында иштеген мурдагы премьер-министр Сапар Исаковго коррупция боюнча айып таккан.
Андан тышкары, УКМК апрелде Бишкек мэриясы бир даанасы 9090 сомдон сатылып алынган көчөттөрдүн иши боюнча кылмыш ишин козгогон. Тергөөнүн версиясы боюнча, келишим Кыргызстандын кызыкчылыктарына каршы түзүлгөн.