Раиса Атамбаев 16-августта күйөөсүнүн жана мурдагы президент Алмазбек Атамбаевдин кармалышы менен ага карата тергөөгө байланыштуу кайрылуу жасады. Ал бийликтин жолдошуна, үй-бүлөсүнө жана үзөңгүлөштөрүнө карата иш-аракеттерин «куугунтук» деп атады.
«Улуу баласы [Алмазбек Атамбаевдин] Сейитбек жырткычтыкка салынып токмоктолгон. Аны күнүгө УКМКга суракка сүйрөп жатышат, гипс менен, балдакчан жүрөт. Үй-бүлөбүздүн жакын бир тууганына эки кылмыш иши ачылды», — деп билдирди Атамбаева.
Ал бийлик үй-бүлөнүн Кой-Таштагы үйүнө мөөр басып кетээрин күтүп жатканын кошумчалады. Андан кийин мурдагы президенттин башка турак жайы калбайт.
«Учурда Ала-Арчадагы мамлекеттик резиденциясындагы үйүбүзгө мөөр басылган. Ага кире албай бизге тиешелүү буюмдарды да алып кете албай жатабыз. Мен Ала-Арчадагы үй биздин каражатка курулганын белгилегим келет. Ал толугу менен биздин акчага жасалган, ошого карабастан [бийлик] ушуну жасап жатат», — деп айтты мурдагы президенттин жубайы.
Заявление Раисы АтамбаевойPosted by Алмазбек Атамбаев on Thursday, August 15, 2019
Анын айтымында, Атамбаевдердин банктык эсеби да камакка алынган. Эсепте «жашап турайын деген кичинекей акча» болгон.
«Мамлекет башчысына [Сооронбай Жээнбековго] кайрылгым келет. Ал 22 жыл жаныбызда, Алмазбек Шаршенович менен жүрдү. Үй-бүлөсү менен да үйүбүзгө келген, жылуу сөздөрдү айткан, достук жөнүндө айткан. Бирок азыр мунун баары тепселенип калганын түшүнүп жатам», — деп билдирди Атамбаева.
Ал президентти «элдин алдында кандай болуп көрүнөөрүн» ойлонууга чакырды.
«Биз мурдагы башкаруучулар кыршылаштарынын жубайларын куугунтуктаган эместигин жакшы билебиз. Алардын балдарын, үй-бүлөсүн да куугунтукташкан эмес. Анткени бул алардын ар намысынан төмөн болгон», — деди ал.
Мурдагы президентке каршы бир нече айып коюлган, алардын ичинде «массалык башаламандыктарды уюштуруу», «адам өлтүрүүгө кол салуу уюштуруу», «адамдарды барымтага алууну уюштуруу» жана башкалар бар. Ал 8-августта эки күнгө созулган катуу каршылык көрсөтүүдөн кийин бийликтин колуна түшүп берген.
