Бишкектин борборундагы Уркуя Салиеванын эстелигинин алдында зомбулукка каршы митинг өттү. Ага жүздөгөн адамдар катышты, ошондой эле митингге бир топ милиционерлер жана митингчилерди «тартипке салгысы» келген адамдар келди.
Митинг 8-мартта аялдардын укугу үчүн маршта жүз берген окуяга каршы реакция болду — анда бет кап жана ак калпакчан 40тай жигит марштын катышуучулары менен уюштуруучуларына кол салып, ал эми милиция чагымчыларды кармоонун ордуна кол салуудан жапа чеккендерди кармап кеткен.
Эки күн өткөндөн кийин милиция кетирген катасын жоюуну чечип, 10-мартта Биринчи май РИИБинин жетекчилиги коопсуздукту сактап берүүнү убадалады.
Митингчилер бийликке бир катар талаптарды койду. Алардын ичинде Свердлов РИИБнин жетекчилигин аялдардын маршындагы зомбулук үчүн отставкага кетирүү, андан тышкары, 8-марттагы окуяны иликтөө талабы бар.
Митинг болжол менен 40 мүнөткө созулду. Сынчылар митингдин модераторлорунун бири Атай Самыйбек акциянын аягында милицияга ыраазычылык билдирип, алар аялдар маршында «бир аз катачылык кетиргенин» айтканына нааразы болушту.
Тергөө изоляторундагы саясатчы Равшан Жээбеков да митингди колдоп, мындан тышкары, акцияга экс-президент Роза Отунбаева жана коррупцияга каршы активист Ширин Айтматова да келген.
Чагымга жол берилген жок
Нааразылык акциясы, жалпы айтканда, тынч өткөнү менен ага каршылар тараптан митингдин жүрүшүнө бир нече кийлигишүү аракети болду. 9-март күнү кеч киргенден баштап митингди пландоо иши жүрүп аткан телеграм тайпанын катышуучулары жашыруун коркутууларды алышкан, ал эми тайпанын өзү бузулуп өчүрүлгөн.
Митинг башталаар алдында Уркуя Салиеванын эстелигинин алдында элечек кийген бир аял отурган. Кийинчерээк, адамдар чогулуп ураандарды кыйкырып башташканда ал элдин алдына чыгып, салттык баалуулуктар тууралуу мегафон аркылуу оюн айткысы келип, чогулгандарды «сойкулар» деп кыйкырган. Бирок ага сөз берилген жок. Митингчилер «уят» деп кыйкыра башташканда элечек кийген аялды милиция кызматкерлери четке чыгарып кетишкен.
Ал «салттык баалуулуктарды коргойм» деп келген жалгыз эле аял эмес, андан тышкары, митингге 8-март күнү үзгүлтүккө учуратылган марштын катышуучуларын кармап, тепкиге алып, милиционерлердин колуна салып берген аялдар да келишкен. Бүгүнкү митингде аларга сөз сүйлөөгө мүмкүнчүлүк берилген жок жана алар чогулгандардын кызыкчылыгына татышпады.
Мындан тышкары, митингге «Кырк чоро» кыймылынын эки мүчөсү келген. Алар журналисттерге жөн гана сейилдеп жүрүшкөнүн айтып, аялдар маршындагы кол салууга тиешели жоктугун билдиришти.
Алардан тышкары, митингге диний үгүттөөчү Өзбек Ажы Чотонов да келген. Ал соцтармактарда өз аудиториясын митингчилерди тартипке салууга чакырган. Ошондой эле мурда атактуу болгон Тата Улан аттуу ырчы да ушундай эле билдирүү жасап, ал да акцияга келген.
Рэп аткаруу Тата Улан адаттагыдай эле бет кап кийген образы менен келип, аялдардын үйдө отурушу керектиги тууралуу пикирин айтты. Митинг аяктаган соң ал милиция менен кошо кетти.
8-марттагы тынчтык жөө жүрүшкө кол салуу тууралуу кененирээк бул материалдан окуңуз.
Видео трансляция:
Тексттик трансляция: