Республикалык штаб Кыргызстанда 6-майга карата коронавирустун жаңы 28 учуру катталганын маалымдады — ооруга чалдыккандардын төртөө медкызматкер. COVID-19ду Бишкек шаарынан 16, Жалал-Абаддан алты, Баткен облусунан төрт, Чүйдөн эки адам жуктуруп алды.
Ушуну менен коронавирусту жуктуруп алган жарандардын саны 871 жетти — анын 221и медкызматкер. Өпкө илдетинен жалпысынан 614 адам айыгып, он эки бейтап каза болду.
Бишкек шаарында коронавирус кескин жайылууда — бүгүнкү күндө борбор калаада илдетти жуктургандардын саны 255 адамды түздү. Ал эми Ош облусунда — 113, Ош шаарында — 169 учур катталды.
Жалал-Абад облусунда 129 киши илдетке чалдыкты. Нарын облусунда коронавирус 103 адамда аныкталды. Чүй облусунда COVID-19 74 адамдан табылды. Баткен облусунда 18 учур катталды. Ыссык-Көл облусунда он учур катталып — баардык бейтаптар илдеттен айыкты. Талас облусунда коронавирустун бир дагы учуру каттала элек.
Учурда ооруканаларда 245 адам дарыланып жатат. Алардын ичинен жети бейтап оор абалда — төртөө жандандыруу бөлүмүндө. Кыргызстан боюнча обсервацияга 675 адам алынды.
Коронавирусту жуктуруп алгандар менен карым-катнашта болгондордун саны 3855ти түздү — алардын баары медициналык көзөмөлгө алынган.
Ошондой эле 6-майга чейин жалпы 59 490 үлгү изилдөөгө келип түштү. Акыркы сутка ичинде жүргүзүлгөн изилдөөлөрдүн саны 1571.