Бүткүл Орусиянын жана Москванын патриархы Кирилл Ысык-Көл облусунда спорттук иш-чарада улуту жана туткан дини үчүн такай ур-токмокко алынган тогуз жаштагы орус баланын үй-бүлөсүнө кат жөнөттү. Бул тууралуу патриархтын басма сөз кызматы билдирди.
Катта ал жабыркаган балага көңүл айтып, «православ ыйык жерлерине зыярат кылып, жаңы достор менен таанышып, ишенимди бекемдөө үчүн» аны үй-бүлөсү менен Москвага келип кетүүгө чакырды.
«Бийлик ар кандай ынанымдагы, улуттагы жана диндеги адамдарга карата келечекте мындай окуялар кайталанбашы үчүн бардык чараларды көрөт деп абдан үмүттөнөм», — деп белгиледи патриарх Кирилл.
Патриархтын басма сөз кызматы белгилегендей, баланын үй-бүлөсүнө Росскызматташтык жардам көрсөтүп жатат. Алардын маалыматына ылайык, баланын үй-бүлөсү Москвага келүүгө даяр. Эгерде ал көчүп кетүүнү чечсе, анда үй-бүлөгө мекендештерди көчүрүп кетүү программасы боюнча жардам көрсөтүлөт.
Ошондой эле Москва патриархынын басма сөз кызматы Бишкек епархиясынын катчысы Александр Пелин өспүрүм жана анын үй-бүлөсү менен жолугушканын кошумчалады.
