Президенттин басма сөз кызматы 22-декабрда Садыр Жапаров Бишкектин чет жакасындагы жаңы «Алтын Казык» жогорку чыңалуудагы көмөк чордондун салтанаттуу ачылыш аземине катышканын билдирди.
Жапаровдун айтымында, жаңы көмөкчү чордондун ачылышы Дордой, Эне-Сай, Дордой-2, Теңдик, Келечек жана Мурас-Ордо конуштарындагы 11 миң керектөөчүнүн электр энергиясынын сапатын жакшыртат. Көмөк чордон бул аймактагы өнөр-жай жана коммерциялык объектилерге да электр энергиясын берет.
Тема боюнча: Бишкекте ЖЭБ-2нин айланасындагы жерлер мыйзамдаштырылды
«Мына эми элибиз эгемендик алгандан бери жаңы энергетика орнотмосун сырттан эч кандай насыя албастан куруп жатат. Буга чейин карызга алып, энергосистеманын карыздары 130 млрд сомго чейин жеткен. Ишибиздин ушинтип илгерилеши өз күчүбүз менен өлкөбүздүн энергетика тармагын кезек-кезеги менен туруктуу өнүктүрүүгө бекем ишеним жаратат», — деди Жапаров.
Президент ЖЭБ-2нин айланасындагы Ак-Ордо жана Ала-Тоо-3 конуштарындагы турак жайлардын документтерин жол-жоболоштуруу жана инфраструктура маселелери чечилип жатканын дагы кошумчалады. Мурдараак бул аймактагы жерлер мыйзамдаштырылган болчу.
