Улуттук коопсуздук мамлекеттик комитетинин басма сөз кызматы Чүй облусунун Кемин районунда курал-жарак жана жардыргыч заттар сакталган жашыруун жай табылганын билдирди.
Атайын кызмат ыкчам иликтөө иштеринин натыйжасында, белгисиз үлгүдөгү тапанча, жылмакай сайлуу мылтык, Ф-1 кол гранатасы жана 5,6 × 15,6 мм R үлгүсүндөгү ондогон ок-дарылар табылганын белгиледи.
«Алындын ала маалыматтар боюнча, табылган курал-жарак, ок-дары жана жардыргыч заттар өзгөчө оор кылмыштарды жасоо үчүн даярдалган», — деп билдирди УКМК.
Аны менен катар, ок-дары сактоочу жашыруун жайды уюштургандарды аныктоо иштери жүрүп жатканын кошумчалады.
«Ок атуучу куралдарды, ок-дарыларды, жардыргыч заттарды жана жардыргыч түзүлүштөрдү укук коргоо органдарына өз ыктыяры менен тапшырган адамдар кылмыш жоопкерчилигинен бошотулат», — деп эскертти УКМК.
Өткөн жылдын ноябрь айында Жалал-Абад облусунун Аксы районунда жергиликтүү тургундун үйүнөн курал-жарак, ок-дарылар табылган. Андан сырткары, шектүүнүн үйүнөн сейрек кездешүүчү жаныбарлардын: аюу, сүлөөсүн жана суусардын териси табылган.
Шектүүгө карата «Ок атуучу куралдарды, ок-дарыларды мыйзамсыз жүгүртүү» беренеси менен сотко чейинки өндүрүш башталган.
