Европа өнүктүрүү жана реконструкциялоо банкы Кыргызстанга Ош облусундагы ирригацияны жакшыртууга 17,87 млн евро бөлөт. Бул тууралуу минкабдын басма сөз кызматы кабарлады.
Каржы министрлигинен каражаттын 14,1 млн евросу кредит, ал эми 3,7 млн евро грант экенин билдиришти.
Минкабдын маалыматына ылайык, өкмөт башчысынын төраганын биринчи орун басары Адылбек Касымалиев Улуу Британия жана Түндүк Ирландиянын Бириккен Королдугуна жумушчу сапары менен барып, Европа реконструкциялоо жана өнүктүрүү банкынын президенти Одиль Рено-Бассо менен жолугушуп, кызматташтык маселелерин талкуулаган.
Касымалиев банкты «жашыл» экономика тармагындагы өз ара пайдалуу чөйрөлөргө инвестициялоо салууга чакырган.
Жолугушуунун жыйынтыгында Кыргызстан жана ЕӨРБ жаңы келишимге кол коюшкан. Документке ылайык, Ош облусунун Араван районунун фермердик жана дыйкан чарбаларын сугат суу менен камсыздоо жакшыртылып, ирригациялык система модернизацияланат.
Сугат суу көйгөйү
Айыл чарба министри Аскарбек Жаныбеков 20-январдагы брифингде 2022-жылы өткөн жылдагыдай эле сугат суусунун тартыштыгынан «кыйынчылыктар болот» деп билдирген.
Ал фермерлердин ишин жакшыртуу жана эгин талааларын сугаруу көйгөйүн жоюу үчүн ведомство ирригациялык каналдарды калыбына келтирүү иштерин баштаганын айткан.
«Биздин кызматкерлердин чарбалар ортосундагы тармакты даярдоосуна 1 миллиард сом бөлүнгөн. Биз жергиликтүү бийлик органдары менен активдүү иштеп жатабыз», — деди министр.
2021-жыл жаан-чачындын аз, кургакчылык болгондуктан дыйкандар үчүн оор болду. Дыйкандар бийликтин көңүлүн көйгөйгө бурдуруу үчүн Бишкекте митингге да чыгышкан.
