Ош шаарында Бабур атындагы академиялык музыкалык-драма театры толугу менен оңдоп-түзөөдөн өткөрүлүп, 24-апрелде пайдаланууга берилди.
Театрдын ачылыш иш-чарасына министрлер кабинетинин төрагасынын орун басары Эдил Байсалов, жергиликтүү бийлик өкүлдөрү жана Өзбекстандын маданият министри Озодбек Назарбеков баштаган делегациянын өкүлдөрү катышты.
Мекеменин 100 жылдыгына байланыштуу реконструкциялоонун долбоолорунун жалпы баасы 5 миллион АКШ долларын түзүп, аны Өзбекстан Республикасы каржылаган. Мындай чечим президент Садыр Жапаровдун Өзбекстанга болгон расмий иш сапарынын алкагында кабыл алынган.
Бабур драма театры
Бабур атындагы драма театры Орто Азиядагы эң байыркы театрлардын бири. Театр 1918-жылы Рахмонберди Мадазимовдун жетектөөсү астында ийрим катары ачылган. Ал эми 1937-жылы театрга саясатчы Сергей Кировдун аты коюлуп, толугу менен «театр» наамын алган.
Кыргызстан эгемендүүлүк алгандан кийин 1992-жылы өзбек акыны Захир-ад-дин Мухаммад Бабурдун аты коюлган. Театр 480 көрүүчүгө ылайыкталган.
Театрдын жамааты бир гана Кыргызстандын түштүгүндө эмес, Өзбекстан, Москвага чейин гастролдошкон. Алар өлкөдө элди руханий жактан азыктандырган алгачкы маданий ишмерлер болушкан.
Театрдын 100 жылдыгы 2018-жылдын октябрь айында белгиленмек, бирок театр оңдоого муктаж болгондуктан маараке жылдырылган.
