Ысык-Көл облустук ички иштер башкармалыгынын балдар иштери боюнча инспекторлору көл жээгинде эмгектенген жашы жете элек 271 баланы аныктады. Бул тууралуу 21-августта облустук милициядан билдиришти.
Маалыматка ылайык, август айында ата-энесинин камкордугусуз калган балдардын болжолдуу жумуш орундарын интенсивдүү текшерүү жүргүзүлдү. Ага ылайык, жалпы 2187 объект көзөмөлдөн өткөрүлдү.
Милициядан жайкы туристтик сезон убагында Ысык-Көл ОИИБнин балдар иштери боюнча инспекторлору «Өспүрүм — эмгек» аттуу ыкчам алдын алуу иш-чараларын байма-бай уюштуруп турарын белгилешти.
Аталган иш-чаранын башкы максаты — облустун аймагында жайкы эс алуу учурунда балдардын коопсуздугун камсыз кылуу, ошондой эле алардын ден соолугуна зыян келтирген эмгек шарттарын аныктоо болуп саналат.
ЮНИСЕФтин маалыматы боюнча, Кыргызстанда 26,7% жашы жете элек балдар эмгектенет. Айыл жергесинде жашаган балдар шаарда жашагандарга караганда көбүрөөк иштөөгө мажбур болушат.
Балдар эмгегинин көрсөткүчү Нарын жана Талас облустарында эң жогору, ал эми эң төмөнкү көрсөткүч — Бишкек жана Ош шаарларында.
