Минкабдын башчысы Адылбек Касымалиев Салык кызматында өткөн кеңешмеде электрондук товардык-транспорттук коштомо кагаздарды (ЭТТК) жоюуга жол берилбестигин билдирди.
Ал салыкчылар отчет тапшыруу процессин жөнөкөйлөтүп, ЭТТК талап кылына турган товарлардын тизмесин кайра карап чыгышарын кошумчалады. Касымалиевдин айтымында, бул үчүн атайын комиссия түзүлүп, ал ЭТТКны жөнөкөйлөтүү боюнча өз сунуштарын берет.
Минкабдын башчысы салык төлөөчүлөр үчүн жагымдуу шарттарды түзүү маанилүү экенин белгиледи. Ал салыкчыларга ишкерлер отчет тапшырууда кабылган көйгөйлөрдү, анын ичинде кезек күтүүлөр менен электрондук системалардын ишиндеги мүчүлүштүктөрдү «ыкчам чечүүнү» тапшырды.
Буга чейин Салык кызматынын жаңы төрагасы Алмамбет Шыкмаматов товарлардын көпчүлүгү үчүн ЭТТКны жоюуну сунуштаган. Анын айтымында, бул талапты мунай, алкоголь, табак продукциялары жана медициналык буюмдар үчүн гана калтыруу керек.
