Жогорку Кеңештин мурдагы депутаты, саясатчы Канат Исаевдин тергөө абагындагы мөөнөтү дагы бир айга узартылды. Мындай чечимди Биринчи май райондук соту кабыл алды.
Исаев 23-октябрда кармалып, 23-ноябрга чейин УКМКнын ТИЗОсуна киргизилген болчу. Кармалгандан бир күн мурда Исаев Кемпир-Абад суу сактагычын коргоо комитетине мүчө болуп кирген.
Соттон экс-депутаттын 2018-жылдын 1-октябрынан бери эч кайда кетпөө тил каты бар экенин билдиришкен.
Бирок Исаевге карата козголгон кылмыш иши жашыруун гриф экенине таянып кеңири маалымат беришкен эмес.
Мурдагы депутаттын туугандарынын айтымында, 23-октябрь күнү аны УКМКга суракка чакырып, бир нече сааттан кийин кармап кетишкен.
Сөз 2017-жылы козголгон кылмыш иши тууралуу болуп жатат. Анда УКМКнын кызматкерлери Исаевди «бийликти күч менен басып алууга» даярдык көрүүгө шектеп кармашкан.
