Президент Алмазбек Атамбаев иш сапары менен төртүнчү европалык өлкөгө — Бельгияга барды. Өлкө башчысынын администрациясы Атамбаевдин Европа өлкөлөрүнө болгон сапарын «мурун болуп көрбөгөндөй» сапар деп атады.
Атамбаевдин Европага болгон сапары 23-мартта башталган жана ал өз ичине беш өлкөнү камтыйт — Австрия, Франция, Швейцария, Бельгия жана Германия.
Бүгүнкү күнгө чейин Атамбаев Австрия, Франция жана Швейцария өлкөлөрүнө барууга жетишти. Бардык үч өлкөдө тең ал мамлекет башчылары — Хайнц Фишер, Франсуа Олланд жана Симонетта Соммаруга менен жолукту.
Вена менен Парижде ал бизнес-форумдарга катышты. Алардын жүрүшүндө кыргыз-австрия жана кыргыз-француз ишкердик кызматташуу маселелери талкууланды.
Атамбаев Францияда да, Австрияда да Кыргызстандагы «ийгиликтүү коррупцияга каршы күрөш» жана өлкөнүн экономикасындагы ачыктуулуктун арткандыгы тууралуу айтты.
«Биз Кыргызстандын эркин адамдардын, эркин ишкерлердин өлкөсү болушу үчүн болгон аракеттерди көрүп жатабыз. Инвестор, ишкер өзүн суудагы балыктай сезиши үчүн», — деп билдирди Атамбаев Франциянын ишкерлеринин алдында.
Президенттин айтымында, Кыргызстан европалык ишкерлер үчүн Евразиялык биримдикке (ЕАЭБ) мүчө өлкөлөр менен Кытайдын рыногуна чыгууга «ачкыч» болуп бериши мүмкүн.
Ал эки президент менен тең Европа биримдиги менен Орусиянын кызматташуусунун мүмкүнчүлүктөрүн талкуулады.
Кыргызстандын президентинин аппараты марттын ортосунда Атамбаевдин Молдовага болгон жеке сапары тууралуу расмий билдирүү тараткан — анда өлкө башчысы Кишиневго Молдова, Орусия жана Европа биримдигинин келечектеги мамилелерин талкуулоо үчүн баргандыгы айтылган.
Атамбаев ошондой эле Орусиянын президенти дагы, Европа дагы Украинада тынчтыкты каалай тургандыгын, ал үчүн «Минскте келишилген макулдашууларды сактоо зарыл» экендигин билдирди.
Учурда өлкө башчысы Бельгияда, анда ал Европа биримдигинин жогорку кызматтагы чиновниктери — Жан-Клод Юнкер, Мартин Шульц жана Дональд Туск менен жолукканы жатат.
Кыргыз президентинин Европа өлкөлөрүнө болгон сапары 2015-жылдын 1-апрелине чейин уланат.
Сүрөттөр тизмеги толукталып турат. Жаңыланууларга көз салып туруңуздар.
Сүрөт: Султан Досалиев.
