Оштун «Алайы» АФК кубогунун топтук баскычынын биринчи матчында Түркмөнстандын чемпиону «Алтын Асырдан» 1:2 эсебинде утулуп калды. Ал эми башкалаанын «Дордою» мейманга барып тажиктердин «Истиклолуна» 0:2 эсебинде жеңишти алдырып ийди.
Өз мекениндеги стадиондо ойнолгон матчта Кыргызстандын азыркы чемпиону түркмөндөрдүн «Алтын Асырынан» 1:2 эсебинде утулду.
«Алай» 1 — 2 «Алтын Асыр»
43’ Алтынмурат Аннадурдыев («Алтын Асыр»)
45+1’ Акрам Умаров («Алай») (автогол)
55’ Акрам Умаров («Алай»)
Ош клубу матчты абдан ишенимдүү баштап, биринчи мүнөттөрдөн эле артыкчылык абалга ээ болду. Бирок беттешүүнүн биринчи жарымы аяктап баратканда «Алтын Асыр» кызып кетип эки гол киргизүүгө жетишти.
Матчтагы эсепти меймандардын чабуулчусу Алтынмурат Аннадурдыев биринчи болуп ачып, «Алтын Асырды» алдыга чыгарды — 1:0.
Биринчи таймга кошулган мүнөттөрдө «Алтын Асыр» өз артыкчылыгын эки эсе арттырды. Топ «Алайдын» коргоочусу Акрам Умаровдон кайып кетип Ош клубунун дарбазачысы Абдулазиз Махкамова барып кожоюндардын дарбазасына кирип кетти — 2:0.
«Алай» оюн аягында эки голго дуушар болуп ыза тартканына карабастан, бул Ош клубунун маанайына эч таасир эткен жок. Экинчи таймдын алгачкы мүнөттөрүнөн тартып эле «Алайдын» футболчулары оюндун эсесин чыгарганы чуркашты.
55-мүнөттө Акрам Умаров меймандардын голун киргизип жиберген өз күнөөсүн жууп «Алайдын» артта калышын азайтты — 2:1.
Матч аяктагыча Ош клубу эсепти теңдөө аракетин токтотпостон, атаандашынын дарбазасына дембе-дем чабуул коюп жатты. Бирок алар голду камсыз кылган жок. «Алай» менен «Алтын Асырдын» ортосундаг беттешүү 2:1 эсебинде түркмөн клубунун пайдасына аяктады.
Биринчи матчтагы жеңиш Түркмөнстандын клубуна «D» тобунун алдыңкы катарына чыгууга жол ачты.
Аброю жагынан Азиядагы экинчи клубдук турнирдин топтук баскычына Оштун «Алайы» былтыр Кыргызстандын чемпиону болгондугу үчүн автоматтык түрдө кирген. Андан айырмаланып башкалаанын «Дордою» АФК кубогунун топтук баскычына жолдомо алыш үчүн квалификациялык баскычта күрөшкөн.
Ошол эле күнү бир нече сааттан кийин топтук баскычтын биринчи матчын Кыргызстандын башка клубу ойноду. Дүйшөмбүнүн Борбордук республикалык стадионунда «Дордой» тажиктердин «Истиклолу» менен беттешти.
Башкалаанын клубу Тажикстандын чемпионунан 0:2 эсебинде утулуп калды.
«Истиклол» 2 — 0 «Дордой»
17’ Дэвид Мавутор («Истиклол»)
22’ Жахонгир Алиев («Истиклол»)
Матчтын кожоюндары алгачкы мүнөттөрдөн тартып эле артыкчылыкка ээ болуп, меймандарга топ киргизүүгө дээрлик беттешүүнүн аягына чейин мүмкүнчүлүк берген жок.
Кыргызстандын вице-чемпионунун футболчулары колдон келишинче коргонуп, бирок дарбазасына тебилген топтон өзүн сактай албай коюшту.
17-мүнөттө матчтын эсебин Дэвид Мавутор ачты. Тажик клубунун ганалык коргоочусу башы менен дарбазанын бурчуна топ киргизип, Валерий Кашуба топко жетпей калды — 1:0.
Беш мүнөттөн кийин матчтын 22-мүнөтүндө «Истиклолдун» жарым коргоочусу Жахонгир Алиев оң тараптан «Дордойдун» дарбазасынын төмөнкү тарабына штрафтык топ тээп, талаа кожоюндарынын артыкчылыгын эки эсе арттырды — 2:0.
Матчтын жүрүшүндө «Дордойдун» коргоочулары абдан жигердүү, кээде одоно коргонуп жатышты, ал үчүн башкалаа клубунун футболчулары калыстан бир нече жолу эскертүү алышты.
Экинчи таймда кожоюндар мурдагыдай жандуу боло алган жок. Анткен менен «Дордой» бир нече жолу атаандашынын дарбазасынын жанында болуп калды. Бирок аны пайдалана албай, өлкөнүн вице-чемпиону мейманда жүрүп бир да гол киргизе алган жок.
Матч 2:0 эсебинде «Истиклолдун» пайдасына аяктады.
Бул жеңиш тажик клубуна үч упай топтоп, анын бул топтон чыгууга мүмкүнчүлүгүн бир топ көбөйттү.
Топтук баскычтын экинчи айлампасы 4-апрелде өтүп, анда Кыргызстандын эки клубу беттешет. «Дордой» өз талаасында Оштун «Алайын» тосуп алат.
Топтон плей-оффко бир гана клуб чыга алаарын эске алганда, эки команда тең АФК кубогунун кийинки баскычына чыгуу мүмкүнчүлүгүн сактап калыш үчүн абдан катуу аракет кылаары бышык.
ТЕМА БОЮНЧА:
- АФК кубогу: «Дордой» конокто жүрүп гол киргизип, топтук баскычка чыкты
- АФК кубогу: «Дордой» өз жериндеги матчта тажиктердин «Хосилотун» утуп алды