Республикалык штабдын маалыматына ылайык, өкмөт 1-июндан тартып кээ бир ишмердүүлүктүн түрлөрүн жандандырат. Алардын ичинде:
- Керектөөчү товарларды, тамак-аш азыктарын өндүрүү жана соода-сатык чөйрөсүндөгү иштин бардык түрлөрү;
- Калкты тейлөө кызматтары тармагындагы иштин бардык түрлөрү;
- Аудит жана консалтингдик компаниялар;
- Жарнама агенттиктери;
- Туристтик жана эс алуу жайлары (эс алуу үйлөрү, пансионттар, тарыхый жайлар), жеке унаалар менен саякаттоо сунушталат.
Ошондой эле, 5-июндан тарта бала бакча мекемелерине ишини улантууга уруксат берилет. Ал эми 8-июндан баштап өлкө ичиндеги рейстер жандандырылат.
«Көрсөтүлгөн иштин түрлөрүн санитардык-эпидемиологиялык ченемдерди катуу сактоо менен жаңылоо керек, эпидемиологиялык шартка жараша уруксат берилген экономикалык иштин түрлөрүнүн тизмесине өзгөртүүлөр киргизилиши мүмкүн», — деп айтылат Республикалык штабдын билдирүүсүндө.
Мындан тышкары, Республикалык штаб айрым багыттар боюнча чектөөлөрдү ала элек. Алар:
- маданий, спорттук, илимий, үй-бүлөлүк, эскерүү жана массалык иш-чараларды өткөрүү;
- көңүл ачуучу жайлардын ишмердүүлүгү (түнкү клубдар, караоке, кальян);
- интернет-клубдар, компьютердик оюн жайлары;
- кинотеатрлар;
- соода жана оюн-зоок борборлорунда жайгашкан тамактануу жайлары;
- балдар оюн-зоок жайларынын, оюн аянтчаларынын ишмердүүлүгү, анын ичинде соода жана оюн-зоок борборлорунда жайгашкандары дагы;
- билим берүү борборлорунун ишмердүүлүгү (тил курстары жана билим берүү кызматтарынын башка түрлөрү) гигиена нормаларын жана келгендердин ортосундагы аралыкты сактоо учурунда гана);
- автобус, микроавтобус аркылуу шаарлар аралык жана аймак аралык жүргүнчүлөрдү ташуу.
Буга чейин, 25-майда, Ош жана Бишкек шаарларында коомдук транспорт кайрадан ишке кирген. Бийлик өкүлдөрү автобус жана троллейбустун айдоочуларына санитардык эрежелерди сактап, 30-35 жүргүнчүдөн көп ташыбаганы сунуштаган. Бирок буга карабастан коомдук транспортто эрежелер толугу менен сакталбай келгенин көрүүгө болот.
