Өзгөчө кырдаалдар министрлиги 26-июлда Баткен облусунун Кадамжай районунда каттуу жааган жаандын кесепетинен сел жүргөнүн билдирди. Натыйжада райондогу бир нече күн мурун калыбына келтирилген 6 көпүрө жараксыз абалга келди.
Социалдык тармактарда тараган видеодо сел жолду жууп, кээ бир тургундардын үйлөрүнө да киргенин көрүүгө болот.
«Ак-Суу дарыясынан эки, жадагалса үч келет. Сел баарын жууп кетти», — деп комментарий берген видеонун автору.
Өкмөттүн Баткен облусундагы ыйгарым укуктуу өкүлчүлүгүнүн басма сөз катчысы Чолпон Бердикулова «Клоопко» табигат кырсыгы адам өмүрүнө зыян келтирген жок деди.
![](https://ky.kloop.asia/wp-content/uploads/sites/6/2020/07/photo_2020-07-27_19-33-00.jpg)
![](https://ky.kloop.asia/wp-content/uploads/sites/6/2020/07/photo_2020-07-27_19-32-57.jpg)
![](https://ky.kloop.asia/wp-content/uploads/sites/6/2020/07/photo_2020-07-27_19-32-55.jpg)
«Баткен облусунун Баткен районунун Кыштут, Суу-Башы, Кара-Булак айыл аймактарында, Кадамжай районунун Көтөрмө, Орозбеков айыл аймактарында мөндүр аралаш жааган катуу жаандын кесепетинен сел жүргөн. Сел суулары негизинен сайларда жүргөн, айрым жерлерде ички жолдорго, эгин талааларга зыянын тийгизген», — деди Бердикулова.
Бердикулова учурда селден улам келтирилген зыян такталып жатканын кошумчалады
12-июлда жамгырдан улам облустагы Лейлек районунун да бир нече аймактарында сел жүрүп, турак-жайларды, үйлүрдүн короолорун, бала бакчанын жертөлөөсүн жана унаа жолдорун суу каптаган.
Ал эми 2-майда Исфана шаарында болгон селдин кесепетинен улам мамлекетке 69 млн сомдук зыян келтирилгени маалым болгон.