16-октябрь күнү Өзгөн районундагы мектеп окуучуларынын калайман мушташынан кийин каза болгон баланын ата-энеси экспертизанын жыйынтыгына макул болбой, кайрадан дайындоону талап кылууда. Бул тууралуу «Клоопко» 7-декабрда Ош ОИИБнин басма сөз кызматы билдирди.
Милициянын маалыматына ылайык, экспертиза өспүрүм жардан кулап кетип, алган жаракатынан улам каза болгон деп аныктаган.
Бирок, баланын ата-энеси «аны атайылап түртүп жиберишкен» деп эсептейт. Алар укук коргоо органдарынан күнөөлүүлөрдү мыйзам чегинде жазалоону талап кылышууда.
Үстүбүздөгү жылдын 16-октябрына караган түнү Өзгөндүн Киров жана Шагым айылдарынын мектеп окуучулары мушташкан. Мушташ болгон жерден качып баратып, өспүрүмдөрдүн бири жардан кулап кеткен.
Жабыркаган баланы атасы 16-октябрда саат 10:00 чамасында бийик жардын түбүнөн таап, ооруканага алып барган. Өспүрүм өзүнө келбей, 17-октябрда ооруканада көз жумган.
Облустук милиция бул боюнча «Адамдардын тобу тарабынан жасалган бейбаштык» беренеси менен кылмыш иши козголгонун кошумчалашты. Учурда тергөө иштери уланып жатат.
