Өзгөчө кырдаалдар министрлиги туруксуз аба ырайына жана күтүлүп жаткан нөшөрлүү жаан-чачынга байланыштуу тоолуу аймактарда сел жүрүү коркунучу бар экенин эскертти. Шашылыш билдирүүнү 11-августта ӨКМ фейсбук барагында жарыялады.
Анда, 12-14-август күндөрү күтүлүп жаткан нөшөрлүү жаан-чачынга байланыштуу тоолуу жана тоо этектериндеги айылдарда сел жүрүшү мүмкүн экендиги айтылат.
«Селдин алдын алуу максатында үй жанындагы арыктарды, дренаждык каналдарды тазалоону сунуштайбыз», — деп жазылат билдирүүдө.
Буга чейин, 7-август күнү Ысык-Көлдүн Түп районуна караштуу Каркыра айыл аймагындагы Талды-Суу, Көөчү, Корумду айылдарында сел жүргөн.
Кырсыктын кесепетинен аймактагы 92 турак жайдын короосун, жертөлөсүн суу каптады — анын 40тан ашыгы Корумду, 28и Талды-Суу жана 24ү Көчү айылындагы үйлөр. Ошондой эле чарбалык жолдор жана айдоо аянттары да суу алдында калган.
ӨКМдин сел жүргөн аймактар боюнча 10-августта берген маалыматында, сел кесепеттери жоюлуп, куткаруучулар туруктуу орундарына кайтышканы айтылат.
