Той-аштарды өткөрүүгө чектөө киргизилет. Бул тууралуу 31-мартта «Биринчи Радионун» эфиринде саламаттык сактоо жана социалдык өнүктүрүү министри Алымкадыр Бейшеналиев билдирди.
«Чечим чыкты, аны бүгүн кечинде же эртең жарыялайбыз», — деди ал.
Анын айтымында, чектөөчү чаралар Бишкек жана Чүй облустарында, андан тышкары, Ысык-Көл облусунун айрым райондорунда киргизилет.
Республикалык штабдын маалыматына ылайык, дал ушул облустарда коронавирус менен ооругандардын саны өсүп жатат. Буга чейин биринчи вице-премьер-министр Артём Новиков азырынча өлкөдө чектөө чаралары киргизилбесин, бирок коомдук жайларда санитардык коопсуздук чаралары күчөтүлөрүн билдирген.
Марттын аягында Кыргызстанда эпидемиологиялык абал начарлай баштаган. Коңшу өлкөлөрдө чектөөлөр киргизилген. Европада COVID-19 илдетинин көбөйүшү коронавирус пандемиясынын үчүнчү толкуну деп белгиленди.
