Кыргыз балбаны Мээрим Жуманазарова Норвегиянын Осло шаарында өтүп жаткан эркин күрөш боюнча Дүйнө чемпионатында алтын байгени багындырды. Ал финалдык беттеште жапониялык балбан Рин Мияжини 2:0 эсебинде утуп, Дүйнө чемпиону болду.
Мээрим Жуманазарова турнирде 68 килограмм салмакта таймашып, төрт беттеш өткөрдү.
Ал алгачкы беттеште түштүк кореялык балбан Минжи Ханы 8:0 эсебинде жеңип, чейрек финалга чыккан. Ал эми чейрек финалда канадалык Оливия Ди Баккону 7:1 эсебинде утуп, жарым финалга жолдомо алган. Жарым финалдык беттеште орусиялык Ханум Велиеваны 3:3 эсебинде жеңип, финалга өткөн.
Жумуназарованын алган алтын медалы бул чемпионатта Кыргызстандын куржунундагы төртүнчү медаль болду. Буга чейин Алибек Осмонов коло, Эрназар Акматалиев күмүш медалга ээ болсо, кыз-келиндер арасындагы эркин күрөштө Айсулуу Тыныбекова алтын байгени багындырып экинчи ирет Дүйнө чемпиону болду.
Норвегияда 2-октябрда башталган күрөш боюнча Дүйнө чемпионаты 10-октябрга чейин уланат. Ага жалпы 15 кыргызстандык спортчу катышып жатат.
Мээрим Жуманазарова
Мээрим Жуманазарова 22 жашта. Ал кыз-келиндер арасындагы күрөштө 76 килограмм салмакка чейинки категорияда күч сынашат.
Үстүбүздөгү жылдын 15-апрелинде Казакстандын Алматы шаарында өткөн Азия чемпионатында алтын медаль уткан. Ал эми 2020-жылы Сербияда өткөн Дүйнө кубогунда алтын медаль тагынган.
Үстүбүздөгү жылдын август айында Жапониянын Токио шаарында өткөн жайкы олимпиада оюнунда коло медаль уткан.
