УКМКнын төрагасы Камчыбек Ташиевдин иниси, Жалал-Абад шайлоо округунан талапкерлигин койгон Шайырбек Ташиев шайлоонун алдын ала жыйынтыгы менен добуштардын дээрлик 62,08 пайызына ээ болду.
БШКнын маалыматына ылайык, учурда автоматтык эсептөөчү урналардын 100%ы саналып бүттү. Ал эми Ташиев үчүн 21 266 адам добуш берген.
Жалал-Абад шайлоо округу боюнча жалпы 106 565 шайлоочу бар, алардын 34 258и добуш берди.
Ташиевден башка Жалал-Абад шайлоо округунан дагы беш талапкер ат салышкан. Алар — Келдибек Жээнбеков, Манас Шаимкулов, Чыңгыз Салымбаев, Таалайбек Атабеков жана Кумарбек Мамасадыков.
Шайырбек Ташиев мурда мамлекеттик кызматта иштеген, учурда жеке ишкер катары белгилүү.
Ал 2001-жылы Бишкектин Октябрь райондук администрациясында иштеп, ошол эле жылы Монополияга каршы жөнгө салуу мамлекеттик агенттигинде жетектөөчү адис болгон.
