Баңгизаттарды мыйзамсыз жүгүртүүгө шектелген «Принцесса Дури» интернет-дүкөнүнөн уурдалган баңгизаттар үчүн күрөөчүлөрдү сабап, кечирим суратууга мажбурлаган топтун үч мүчөсү кармалды. Бул тууралуу 4-апрелде Ички иштер министрлигинен билдиришти.
Маалыматка ылайык, 26-мартта соцтармактарда күрөөчүлөр делген жарандарды белгисиз адамдар сабап жаткан видеолор жарыяланып, коомчулукта талкууга түшкөн.
Анда жарандар өздөрүн «милиция кызматкерлерибиз» деп тааныштыруу менен күрөөчүлөрдү ээн жерде сабап, «Принцесса Дури» аталышындагы интернет-дүкөндөн уурдалган баңгизаты үчүн кечирим суроого мажбурлашкан. Ошондой эле бул көрүнүштү камерага тартып, кураторлоруна жөнөтүшкөн.
ИИМдин Баңгизаттарды мыйзамсыз жүгүртүүгө каршы күрөшүү кызматы аталган иш боюнча иликтөө жүргүзүп, анын алкагында 3-апрель күнү 22, 23, жана 19 жаштардагы үч жаранды кармаган.
Шектүүлөрдүн жашаган жерлеринде тинтүү жүргүзүлүп, буюм далилдер алынган. Учурда баңги топтун башка мүчөлөрүнүн өздүгү такталып, атайын иш-чаралар жүргүзүлүп жатат.
ИИМдин маалыматына ылайык, өткөн жылы интернетте мыйзамсыз жүгүртүүгө коюлган 230 килограммдан ашык психотроптук заттар алынып, 10го жакын баңги каражаттарын иштеп чыгарган лаборатория жоюлган.
