Президент Садыр Жапаров Жалал-Абад жана Ысык-Көл облусундагы райондордун, шаарлардын тургундарына ооз ачар уюштурду. Бул тууралуу президенттин облустардагы ыйгарым укуктуу өкүлчүлүгүнөн билдиришти.
Маалыматка ылайык, 13-апрелде Ысык-Көл облусунун Каракол шаарында жергиликтүү тургундарга жана Жети-Өгүз, Ак-Суу, Түп райондорунун жашоочуларына ооз ачар өткөрүлдү. 14-апрелде Балыкчы шаарында жергиликтүү элге жана Тоң, Ысык-Көл райондорунун тургундарына ооз ачар уюштурулду.
Сый тамакка президенттин атынан минкабдын төрагасынын биринчи орун басары Адылбек Касымалиев менен Ысык-Көл облусунун башчысы Илияз Иманбетов катышты.
Ал эми 14-апрелде өлкө башчысынын атынан Аксы, Ала-Бука, Чаткал, Токтогул райондорунун жана Таш-Көмүр, Кара-Көл шаарларынын тургундарына ооз ачар өткөрүлсө, 15-апрелде Сузак, Базар-Коргон, Ноокен райондорунун, Жалал-Абад жана Майлуу-Суу шаарларынын жашоочуларына сый тамак тартылды.
Жалал-Абаддагы ооз ачарга минкабдын төрагасынын орун басары Бакыт Төрөбаев, президенттин облустагы ыйгарым укуктуу өкүлү Абсаттар Сыргабаев катышты.
Ооз ачарга канча сом кеткен жана каражат кайдан сарпталганы белгисиз. Бул боюнча президенттин басма сөз кызматынан маалымат алууга мүмкүн болгон жок.
