Чүй облусунун Молдовановка айылында жайгашкан №27 колониясынын дагы үч кызматкеринде коронавирус аныкталды. Бул тууралуу Саламаттык сактоо министрлигинин орун басары Нурболот Үсөнбаев 20-майда билдирди.
«[Буга чейин коронавируска чалдыккан] төрт кызматкердин контакттарын баарын текшергенде чыккан. [...] Дарыланууга жөнөтүлүп, көзөмөлгө алынган. Байланышта болгондордун баарын изилдеп, эпидемиологиялык иликтөөлөр уланып жатат», — деди Үсөнбаев.
Буга чейин 17-майда №27 колониянын төрт кызматкеринде COVID-19 аныкталган. Учурда алар Бишкектеги жугуштуу оорулар бөлүмүндө дарыланып жатышат.
Мындан сырткары Бишкектеги ТИЗО-1 жана бир нече колониянын кызматкерлери, кызматкерлер госпиталы менен поликлиникасындагы 18 медик текшерилген. Жалпысынан 543 кызматкердин анализдери изилдөөдөн өткөн. Бардыгынын ПЦР-анализдери терс жыйынтык көрсөткөн.
