Кыргызстандын ишкерлери кыргыз-казак чек арасындагы кырдаалдан улам тартып аткан чыгымдардын ордун толтурууу үчүн Евразия экономикалык биримдигинин сотуна кайрылышмакчы.
Кыргызстандын улуттук ишкерлер клубу Казакстан менен чектеш чек арада жабыркаган ишкерлердин чыгымдарын толтуруу үчүн чара көрүү долбоорун иштеп чыккан.
Резолюцияга ылайык, кыргыз-казак чек арасындагы кырдаалды мониторинг кылуу боюнча көз карандысыз комиссия түзүү максатында Евразия экономикалык биримдигинин соту менен Евразия экономикалык комиссиясына кайрылуу үчүн документтер даярдалат.
Ошондой эле, ишкерлер өкмөткө 20-ноябрга чейин зыян тарткан ишкерлердин чыгымдарын баалай турган биргелешкен жумушчу топту түзүүнү сунушташууда.
Мындан тышкары, аталган топ жабыркаган ишкерлерди айрым бир учурларга чейин салык, каржы жана башка милдеттенмелерден бошотуу боюнча долбоорлордун токтомун иштеп чыгышы керек.
Азырынча өкмөт жабыркаган ишкерлер үчүн болгону социалдык, салык жана бажы төлөмдөрүнүн төлөө мөөнөттөрүн жылдырып бере тургандыгын билдирген. Бирок азырынча бул жеңилдетүүлөр качан күчүнө кире тургандыгы белгисиз.
ТЕМА БОЮНЧА:
- Кыргызстан менен Казакстандын ортосундагы дипломатиялык араздашуу эмнеге алып келди?
- Казакстандын бийлиги кыргыз жүк ташуучулары тарабынан 300дөн ашык эреже бузууларды аныктаган
- Өкмөт чек арада калган ишкерлер үчүн салык мөөнөтүн жылдырып берет