Ош шаарынын борбордук аянты оңдоп-түзөөдөн өткөрүлөт. Ал үчүн Кыргызстандагы жолдорду оңдогон Кытайдын «Чайна Роад» компаниясы өз эсебинен 27 млн сом жумшайт.
Ош шаарынын борбордук аянтын толук капиталдык оңдоп-түзөөдөн өткөрүү үчүн ремонт иштери башталды. Бул тууралуу мэриянын шаар куруу жана муниципалдык менчик башкармалыгынын жетекчиси Мирлан Исраилов «Клоопко» билдирди.
Анын айтымында, ремонт иштеринин жүрүшүндө Өчпөс от монументинен тарта Айыл-чарба техникумунун корпусуна чейин жаңы асфальт төшөө жана темир тосмолорду жаңыртуу пландалган.
«Оңдоп-түзөө Ош шаардык мэриясы жана Кытайдын “Чайна Роад” компаниясынын ортосунда 2016-жылы 17-майда түзүлгөн меморандумдун негизинде ишке ашууда. Жолдор башкармалыгынын божомолу боюнча оңдоп-түзөө иштерине 27 млн сом кетээри күтүлүүдө. Каражатты “Чайна Роад” компаниясы достуктун белгиси катары өз эсебинен сарптамакчы», — деди Исраилов.
Ал кошумчалагандай, бул «Чайна Роад» менен түзүлгөн алгачкы келишим эмес. 2016-2017-жылдары компания өз эсебинен 5 млн сомго Ош шаарынын жолдорундагы зебраларды боёп берген.
Аянтты оңдоп-түзөө иштерин ушул жылдын июль айына бүтүрүү пландалууда. Ага байланыштуу 11-майдан тарта борбордук аянт эки айга жабылды.
ТЕМА БОЮНЧА:
- ЖМК: Мамлекеттик буйрутмадан бир миллиард сом уткан компаниянын «Лексусун» министр минип жүрөт
- Транспорт министрлиги: «Чайна Роад» «Лексусту» министрден өзү алды
- Министр кытай подрядчигинин «Лексусун» «кызматтык командировкалар» үчүн айдап жүргөн