Ички иштер министрлигинин (ИИМ) басма сөз кызматы 15-июлда маалымдагандай, Коопсуздук кеңешинин мурдагы катчысы Бусурманкул Табалдиев издөөгө жарыялады. Тергөө аны кримтөбөл Азиз Батукаевдин мыйзамсыз бошотулушу тууралуу иш боюнча издеп жатат.
24.kg басылмасынын маалыматы боюнча, Табалдиев бийлик Батукаевди бошотуу тууралуу ишке байланыштуу аткаминерлер менен дарыгерлерди кармап баштаганда Кыргызстандан чыгып кеткен.
Ал 2011-2013-жылдары Кыргызстандын Коргоо кеңешин, мындан тышкары УКМКны башкарып турган. Ошондой эле ал 2015-2016-жылдары мурдагы президент Алмазбек Атамбаевдин кеңешчиси болгон, ага чейин кулатылган президент Курманбек Бакиевдин администрациясында иштеген.
Батукаевдин бошотулушу
Нарын шаардык соту кримтөбөл Азиз Батукаевди 2013-жылы «курч миелобластык лейкоз» диагнозунун айынан абактан бошоткон. Кийинчерээк меданыктама жасалма экени аныкталган. Бирок ал учурда Батукаев өлкөдөн чыгып кетүүгө үлгүргөн.
Батукаев бир катар беренелер, анын ичинде массалык башаламандыктарды уюштуруу жана куралдарды мыйзамсыз сактоо боюнча 16 жыл 8 айга эркиндигинен ажыратылган.
Бийлик Батукаевдин мыйзамсыз бошотулуп кетиши боюнча иликтөөнү 2019-жылы кайра жандандырган. Бул иш боюнча врачтар, мурдагы саламаттык сактоо министри Динара Сагынбаева, мурдагы вице-премьер-министр Шамил Атаханов жана экс-башкы прокурор Аида Салянова кармалышкан. Сагынбаева жана Атаханов үй камагына чыгарылган.
Батукаевди бошотуу тууралуу айыбы Алмазбек Атамбаевди экс-президент макамынан жана кол тийбестиктен ажыратууга түрткү болгон.
