Президент Сооронбай Жээнбеков Коопсуздук кеңешинин жыйынында өзгөчө абал режимин узартуу тууралуу чечим кабыл алынганын билдирди. Бийлик мындай тартипти коронавирус инфекциясына каршы күрөшүү үчүн киргизген. Бул инфекция жуктуруунун очоктору катталган шаарларды, анын ичинде жарандарды өздөрүн обочого алууга мүмкүн кылды.
«Эпидемиологиялык кырдаалды эске алып, Бишкек, Ош, Жалал-Абад шаарларында, Нарын облусунун Ат-Башы районунда өзгөчө абалдын мөөнөтү узартылат», — деди ал.
ӨА режими Ош облусунун Кара-Суу жана Ноокат райондорунда жана Жалал-Абад облусунун Сузак районунда алынат, бирок ал жакта өзгөчө кырдаал тартиби күчүндө калтырылат.
«Өкмөт, бардык мамлекеттик органдар, Коопсуздук кеңеши тарабынан сунушталган тийиштүү антикризистик иш-чараларды улантуусу зарыл. Планга өзгөртүүлөрдү киргизгенде, комендатуралардын, жергиликтүү бийликтин бизнеске жеңилдиктерди берүүгө тиешелүү сунуштарын, ой-пикирлерин эске алуу керек», — деди Жээнбеков.
Буга чейин Бишкектин коменданты Алмазбек Орозалиев бизнеске жеңилдиктерди берүү тууралуу билдирген. Анын айтымында, адамдар күнүмдүк кирешеге иштеген ишканаларды ачуу пландалууда — бул курулуш, авто унаа оңдоо жайлары жана такси кызматтары.
Мыйзам боюнча, ӨА режимин узартуу тууралуу чечимди парламент жактырышы керек. Мурдараак депутат Дастан Бекешев бул маселе боюнча отурум 30-апрелде өтөөрүн жана ӨА тартибинин мөөнөтү узартылышы мүмкүн деп билдирген.
Өзгөчө абал режими Бишкек, Ош, Жалал-Абад шаарларынын, Ош облусунун Ноокат жана Кара-Суу райондорунун жана Жалал-Абад облусундагы Сузак районунун аймагында 25-мартта киргизилип, 2020-жылдын 15-апрелинде айдын аягына чейин узартылган.
Нарын шаарынын жана Нарын облусунун Ат-Башы райондорунун аймагына өзгөчө абал 2020-жылдын 15-апрелинде киргизилген. Буга облуста коронавирус инфекциясын жуктуруу учурлары көбөйгөнү себеп болгон.
28-апрелге карата өклөдө коронавирус жуктуруунун 708 учуру катталды. Ошол эле маалда пандемия башталган убактан бери өлкөдө айыкты деп эсептелген 416 бейтап ооруканадан чыгарылды. Пандемия шартында COVID-19 аныкталган 8 адам каза тапты.
