Спортсмен жана ыктыярчы Абдурахманхаджи Муртазалиев 9-июлда Бишкектин №1 клиникалык ооруканасынын кызматкерлери ал чогултулган каражатка алып берген беткаптар менен антибиотиктерди алышпаганын билдирди.
«Беткаптарыбыз кайда?»
Муртазалиев Инстаграм барагында видео жарыялады. Ал видеодо оорукананын медиктери ыктыярчылар алып келген беткаптарды алышпаганын айтышкан.
Спортчу Kaktus.Media басылмасына курган маегинде, медиктерге коргонуу каражаттарын жана препараттарды сатып алуу үчүн кайдыгер эмес жарандардан акча чогултканын айтып берген. Ыктыярчы чогулган акчага зарыл медициналык аспаптарды жана препараттарды сатып алып, Бишкектин №1 клиникалык ооруканасынын башкы дарыгерине берген. Бирок бир нече күндөн кийин ал медперсоналдан эч кандай беткаптарды албаганы тууралуу билдирүүлөрдү ала баштаган.
«Медицина кызматкерлери биз алар үчүн сатып алып берген респитарлорду көрүшпөптүр», — деди ал.
Анын айтымында, сатып алынган беткаптардын көбү дал ошол ооруканага берилген, анткени ал жакта абал «абдан оор».
«Беткаптардын эң эле көбү ушул ооруканага берилген, анткени ал жакта баарынан да оор, очогу ошол жерде. Интернеттеги үрөй учурган видеолордун бардыгы, адамдар кире беришинде каза таап атканы тартылган, дал ушул ооруканада», — деп түшүндүрдү ыктыярчы.
«Медпрепараттар менен жеке коргонуу каражаттардын бардыгы кампада»
Оорукананы башкы врачы Жусуп Бошкоев «Клоопко» курган маегинде ыктыярчылардан түшкөн бардык керектүү медкаражаттар менен препараттар кампада сакталуу экенин билдирди, анткени врачтар алдын ала бир нече күнгө жеке коргоочу каражаттар менен камсыздалган.
«Алардын ою боюнча биз бул беткаптарды иштеп жаткандарга дароо берип салышыбыз керек. Бирок дүйшөмбү күнү биз бардык керектүү коргоону үч-төрт күн алдыга берип койгонбуз. [...] Алар алып келгендер кампадагы дарыканада жатат. Бизден кимдир-бирөө аларды алып кеткен жок да. Бүгүн биздин кыздар видеого тартып, беткаптар жана препараттар кампада жатканын жана кимге керек болсо, ошого берилерин көрсөтүштү», — деди башкы дарыгер.
Оорукананын медиктери ыктыярчылар берген жардам кампада сакталып атканын тастыктоо катары видео жаздырып чыгарышты. Видеодо врачтар оорукананын жетекчилиги гумжардамды сатпаганын айтып, ыктыярчыларды такталбаган маалымат таратпоого чакырышты.
«Интернетке гумжардам сатылып жатат деген видео чыккан. Биз ал эч жакка кеткен жок деп айткыбыз келет. Бизди туура түшүнгүлө, биз бардыгын чыгымдалышына жараша берип жатабыз. Силер алып келип бергендердин бардыгын, бардык гумжардамды дароо берип сала албайбыз. Сураныч, адамдарды адаштырбагыла», — деп айтат видеодо медик ыктыярчылар алып келип берген респиратор жана антибиотиктерди көрсөтүп.
№1 ооруканасындагы «чыдагыс кырдаал»
Бул №1 оорукананын аты аталып аткан биринчи жолку эле жагдай эмес. Мурдараак клиниканын хирургу жетекчилигин сынга алган. Ал клиникадагы «киши чыдагыс» иш шарттарына даттанып, башкы дарыгер Жусуп Бошкоевди коррупцияга айыптаган.
«Башкы врачыбыз эң жөнөкөй шарттарды түзүп берүүнүн ордуна ишибизге тоскоолдук жаратып жатат. Муну жаткырбай, тигини жаткыр деп фамилиялар жазылган ар кандай каттарды жазат. Ал арада ооруканабызга жата албай имараттын босогосунда адамдар өлүп жатат. Башкы врач жада калса душ кабиналарын коё алган жок. Төрт күндөн бери кызыл тилкеден тер басып чыгып жатабыз, ал жерде болсо ысык суу жок. Муздак суу менен жуунгандыктан кырылдап калганыбызды көрүп жатасыңар. А биз болсо ошол беткап менен дем алышыбыз да керек», — деген ал.
Бирок башкы дарыгер айыптын бардыгын четке кагып, хирургду «арызданганды жактырган урушчаак адам» деп сыпаттады.
«Дөлөт Ибраимов — арызданып көнүп алган урушчаак адам. Март айында өз кесиптештерине да арыз жазып, кийин ал тастыкталган эмес. Аны менен соттошот элем, бирок азыр ушундай кырдаалда, убактым жок», — деген башкы врач.
Хирургдун билдирүүсүнөн кийин Саламаттык сактоо министрлиги Бишкектин №1 клиникалык ооруканасын жана анын башкы дарыгерин коррупция фактысына текшерген атайын комиссия түзүлөөрүн билдирген.
Саламаттык сактоо министрлигинин расмий маалыматына ылайык, 10-июлда өлкөдө медиктер COVID-19 жуктурган 1450 учур жана 5 өлүм катталды.
БУЛ БОЮНЧА ДАГЫ КАРАҢЫЗ:
Бишкектин №1 ооруканасы текшерилет. Буга чейин хирург башкы врачты коррупцияга айыптаган
