Улуттук статистикалык комитет үй-бүлөлү зомбулук жана кылмыштар боюнча жыйынтыктоочу маалыматтарды жарыялады. Улутук статкомдун маалыматына ылайык, 2019-жылы өлкөдө аялдарга карата 4,4 миң кылмыш жасалган, бул 2018-жылга салыштырмалуу 14%га көп.
Аялдарга карата көбүнчө кандай кылмыштар жасалган?
2018-жылга салыштырмалуу аяктаган кылмыш иштери боюнча адамды уурдоо (2,3 эсеге), зордуктоо (2,1 эсеге) жана адам сатуу (2 эсеге) учурларынын үлүшү өстү.
Ошондой эле, 2019-жылы аялдарды мажбурлап никеге тургузууга байланышкан 24 кылмыш жана диний ырым-жырымдарды өткөрүдө нике курагы жөнүндө мыйзамдарды бузуу менен 11 кылмыш жасалган.
Аялдар көбүнесе жардам сурап кайда кайрылышат?
Комитеттегилер билдиришкендей, үй-бүлөлүк зомбулук учурлары боюнча 2019-жылы кризистик борборлорго, кайрымдуулук жана коомдук фонддорго жана аксакалдар сотуна жалпы 7 818 адам кайрылган, алардын ичинен 85%ы — аялдар. Кайрылуулардын көбү кризистик борборлорго туура келген — ал жакка жардам сурап 6 687 адам барган.
Улуттук статкомдун маалыматына ылайык, үй-бүлөлүк зомбулуктан жабыркагандардын үчтөн бири 18-34 жаштагы кыз-келиндер, кризистик борборлорго жардам сурап көбүнесе ушул курактагылар кайрылат. Ал эми мындан улуу курактагылар кризистик борборлорго көп деле кайрылбайт.
Ошол эле учурда Улуттук статком 2020-жылга карата маалыматтарды талдап чыга элек. БУУнун Кыргызстандагы Калк жайгаштыруу фонду (ЮНФПА) пандемиянын айынан гендердик теңсиздик күчөп, аялдарга күч келип, аялдар үй-бүлөлүк зомбулукка көп дуушар боло баштаганын билдирүүдө.
Үй-бүлөлүк зомбулук
Өлкө аймагында аялдардын өлүмүнө алып келген үй-бүлөлүк зомбулук учурлары көбөйдү. ИИМдин статистикасына ылайык, 2020-жылы үй-бүлөлүк зомбулуктун 9 025 учуру катталган. Ошол эле учурда жакындарынын жана туугандарынын колунан запкы жегендер басым, коркуу жана башка себептерден милицияга кайрылышпайт.
Дагы окуңуз:
«Аны баары бир өлтүрмөкмүн». Кыргызстандагы фемицид тууралуу «Клооптун» изилдөөсү
Үй-бүлөлүк зомбулуктан жапа чеккендер үчүн «117» чукул байланыш кызматы ачылат
«Башкы максат — аман калуу». Агрессор менен жалгыз калганда эмне кылыш керек?
