Кыргызстандын футбол боюнча улуттук курама командасы 2-сентябрда «Үч улуттун кубогу» турниринде Палестина курама командасын 1:0 эсебинде жеңип алды.
Жалгыз голду оюндун башталышында дебютант Азим Азаров киргизди.
Беттеш Бишкек шаарындагы Дөлөн Өмүрзаков атындагы стадиондо өттү.
![](https://ky.kloop.asia/wp-content/uploads/sites/6/2021/09/027A5162-scaled-1.jpg)
![](https://ky.kloop.asia/wp-content/uploads/sites/6/2021/09/027A5529-scaled-1.jpg)
Беттеш кандай өттү?
Алгачкы жыйырма мүнөттү эки команда тең бирдей коркунучтуу чабуулдар менен өткөрүштү, бирок бул убакыт аралыгында эки команданын оюнчулары дарбазага түз гол киргизе алган жок.
23-мүнөттө Кыргызстан үчүн гол киргизүүгө жакшы мүмкүнчүлүк жаралды, бирок Гүлжигит Алыкулов тепкен топ штангага тийип калды. Кийин кыргыз оюнчулары бир гол киргизишти — жарым коргоочу Азим Азаров оң флангдан берилген топту башы менен сүзүп дарбазага киргизди.
Гол киргенден кийин демилге кыргыз курамасына өттү.
Экинчи таймдын башында Кыргызстан экинчи голду киргизүүгө аз калды — оюнчулар үч жолу гол кире тургандай учур жарата алды.
Андан соң, командалар коркунуч жараткан чабуулдарды жасашты. Беттештин акырында палестиналыктар өтө эле кооптуу учурларды жаратып, бирок аларды ишке ашыра алышкан жок.
7-сентябрь күнү саат 20:30да боло турган кийинки оюнда Кыргызстан Бангладеш курама командасы менен беттешет.
«Үч улуттун кубогу» 2023-жылы өтүүчү Азия Кубогуна даярдыктын алкагында өтүп жатат. Турнирдин катышуучулары Кыргызстан, Палестина жана Бангладештин курама командалары.